Yurtdoshlarimizning Saudiya Arabistoniga haj safarlari muvaffaqiyatli davom etmoqda. Hozirga kunda Madinai munavvara va Makkai Mukarramadagi ziyoratchilarimizning soni 3500 tadan oshdi. Jumladan, Madinai munavvaradagi 1200 dan ziyod vatandoshlarimiz ko‘tarinki ruh bilan Rasululloh (s.a.v.)ning ravzalari, Uhud tog‘i, Masjidi Qiblatayn va Islom tarixida ilk bor barpo etilgan “Qubo” masjidini ziyorat qilmoqdalar.
Xususan, Uhud tog‘i yonida hazrati Hamza roziyallohu anhu, u kishining safdoshlari Mus'ab ibn Umayr va Abdulloh ibn Jahsh roziyallohu anhumo va boshqa sahobiylar dafn qilingan qabriston ziyorat qilinib, ular haqiga duolar qilindi.
“Masjidi qiblatayn” (ikki qiblali masjid) ba'zan “Masjidi banu Salama” deb ham ataladi. Chunki, bu yerda o‘z davrida arablarning Banu Salama qabilasi yashagan. Adr tepasiga qurilgan ushbu masjidda avval ikki mehrob bo‘lib, biri “Baytil maqdis” (Quddus), ikkinchisi Makkadagi “Baytulloh”ga qaragan edi. Chunki, hijratdan keyin o‘n yetti oygacha “Baytil maqdis”ga qarab ibodat qilingan. Nabiy sollallohu alayhi vasallam u masjidda namoz o‘qiyotganlarida Alloh taolo tomonidan Baytullohga yuzlanib namoz o‘qishga amr bo‘lganligi uchun ham u masjid ikki qiblali masjid deyilgan. Hozir “Bayti maqdis”ga qaragan mehrob berkitilgan.
Qubo masjidi Madinaning janubi-g‘arbida, Masjidi Nabaviydan besh kilometr masofada (mo‘'tadil yurishda yarim soatlik yo‘l) joylashgandir. Qubo masjidi Islom tarixida birinchi qurilgan masjid bo‘lib, Qur'oni karimda u haqda shunday quyidagi oyat mavjud: “...Birinchi kundan taqvoga asoslangan masjid esa, unda turishingizga loyiqroqdir. Unda poklanishni xush ko‘radigan kishilar bor. Alloh esa poklanuvchilarni sevar” (Tavba, 108)
Abu Abdulloh Yoqub Hamaviy “Mo‘'jamul buldon” asarida quyidagi ma'lumot mavjud berilgan: “Quboning asli ismi “Quduq” edi. Qubo esa Amr ibn Avf bolalariga tegishli qishloqning nomi bo‘lgan. Payg‘ambarimiz (s.a.v.) Madinaga hijrat qilayotganlarida o‘sha yerda to‘xtaganlar va masjid qurganlar, so‘ng unga Qubo deb nom berganlar. Ibn Abu Xaysama aytadi: “Masjid qiblasiga birinchi toshni Rasululloh (sollallohu alayhi va sallam) qo‘ydilar. So‘ng Abu Bakr Siddiq (r.a.), keyin Umar ibn Xattob (r.a.) kelib Abu Bakrning toshi ustiga tosh qo‘ydi. Shundan so‘ng odamlar uni qurishga boshlashdi”. Masjidda Abu Ayyub Ansoriyga (r.a.) tegishli quduq, Payg‘ambarimiz (alayhissalom) tuyalarining cho‘kkan o‘rni bo‘lgan.
Ayni vaqtda, Makka shahrida yetib kelgan 2300 dan ziyod ziyoratchilarmiz umra amallarini ado etib, “Masjidi Haram”da ibodat bilan shug‘ullanmoqdalar. Yurtdoshlarimiz ibodat uchun barcha sharoitlar yaratib berishga harakat qilayotgan, chiroyli muomala-munosabatlarda bo‘layotgan ishchi guruh a'zolari, shifokorlar, ellikboshilar va oshpazlarning beminnat xizmatlaridan minnatdorligini izhor etmoqdalar.
Muborak haj amallarini bajarishga hushnudlik bilan tayyorgarlik ko‘rayotgan ziyoratchilarimiz aziz va mo‘'tabar Vatanimizga tinchlik va osoyishtalik, xalqimizga farovonlik, dasturxonlarimizga to‘kin-sochinlik, muhtaram Yurtboshimizning el-yurt manfaati yo‘lidagi barcha xayrli ishlariga muvaffaqiyatlar tilab duolar qilmoqdalar.
Din ishlari bo‘yicha qo‘mita Axborot xizmati