25 sentabrda Singapur hukumati havoning rekord darajadagi ifloslanganligi sababli mahalliy maktablarni yopib qo‘ydi. Ifloslanganlik darajasi maksimal qiymatdagi chegaradan – 320 birlikdan oshib, mutaxassislar tomonidan “xavfli” deb baholandi.
Keksa va kam ta'minlangan odamlarga himoyalovchi niqoblar tarqatildi. Korxonalar ishlashda davom etaverdilar, biroq ularga ishchilar uchun qulayroq sharoitlarni yaratish va dam olishga ajratilgan vaqtni oshirish tavsiya qilindi. Shuningdek, singapurliklarga iloji boricha ko‘chaga chiqmaslik tavsiya qilindi.
Singapurning quyuq tutun ichida qolishiga Indoneziyadagi yong‘inlar sabab bo‘ldi. Bundan bir necha hafta oldin Indoneziyada qishloq xo‘jaligi maqsadlarida yong‘in uyushtirganlikka aloqador bo‘lgan bir necha kompaniyalar rahbarlari hibsga olingandi.
Yong‘inlarning asosiy o‘choqlari Kalimantan va Sumatra orollarida joylashgan. 23 sentabrda Palangkaraya shahrida havoning ifloslanganligi deyarli 2 ming birlikka yetdi, vaholanki 150 birlikning o‘ziyoq hayot uchun xavfli hisoblanadi.
Mutaxassislarning ta'kidlashicha, kuchli qurg‘oqchilik sababli tutunlanganlik noyabr oxirigacha davom etadi.
Bu orada Singapur aholisi quyuq tutun ichida qolgan shahar manzaralari va niqob taqib olgan holda tushgan selfilarini chop etmoqdalar.
