Bugun, 6 oktabr kuni Qatar poytaxti Doha shahrida boks bo‘yicha kattalar o‘rtasidagi jahon chempionati boshlanadi. O‘z tarixida 18-marotaba tashkil etilayotgan dunyo birinchiligida 260 nafar bokschi 10ta vazn toifasida bahslarga kirishadi. Turnirda olimpiada uchun 23ta yo‘llanma o‘ynaladi.
Ushbu jahon chempionatida O‘zbekiston sharafini 8 nafar sportchi - Hasanboy Do‘smatov, Shahobiddin Zoirov, Murodjon Ahmadaliyev, Fazliddin G‘oibnazarov, Bektemir Meliqo‘ziyev, Elshod Rasulov, Rustam To‘laganov hamda eng og‘ir vazn toifasida Bahodir Jalolov himoya qiladi.
Jahon chempionatiga eng ko‘p ishtirokchi Yevropadan kelgan – 94 nafar. Osiyodan – 66, Shimoliy va Janubiy Amerikadan – 51, Afrikadan – 32, Okeaniyadan – 17 nafar bokschi chempionat medallari va Olimpiya o‘yinlari yo‘llanmalari uchun ringga ko‘tariladi.
5 oktabr kuni “Ali Bin Hamad Al Attiya” sport majmuasida jahon chempionatining tantanali ochilish marosimi o‘tkazildi. Musobaqalar bugun boshlanadi, hal qiluvchi final janglari 15 oktabrga belgilangan.