16 oktabr kuni Angliyaning Manchester shahrida taekvondo VTF bo‘yicha yilning nufuzli turnirlaridan biri – Manchester Gran-Prisi boshlandi. Musobaqaning ilk kuni +87 kg vazn toifasida g‘olib va sovrindorlar aniqlandi.
Amaldagi jahon chempioni Dmitriy Shokin barcha raqiblarini mag‘lubiyatga uchratib, Gran-Pri g‘olibiga aylandi. U finalga qadar koreyalik Ju Xo Cholni 16:4, eronlik Moradini 10:5 hisobida mag‘lub etdi. Yarim finalda yana bir eronlik sportchidan ustun keldi. Bu haqda "Olamsport.som" xabar bergan.
Xabarda aytilishicha, hal qiluvchi final bellashuvida Shokin kubalik raqibini oltin ochko evaziga taslim etib, Gran-Pri g‘olibiga aylangan. Ushbu muhim g‘alaba Dmitriy Shokinga 40 reyting ochkosi hamda 5000 AQSh dollarini taqdim etdi.
Shuningdek, endilikda Shokin reytingda birinchi o‘ringa ko‘tarilib oldi. Shu paytgacha reytingda peshqadamlik qilib kelgan Jasur Boyqo‘ziyev esa aksincha ikkinchi o‘ringa pastladi. Boyqo‘ziyev Manchester Gran-Prisining ikkinchi davrasida belaruslik sportchiga 5:6 hisobida yutqazib qo‘ydi.
Bugungi bahslarda O‘zbekiston terma jamoasining yana ikki vakili aka-uka Maksim va Nikita Rafalovich dayanga chiqishadi.
Eslatib o‘tamiz, musobaqada oltin medal sohibi 40 reyting ochkosiga, kumush medal sovrindori 30, uchinchi o‘rinni egallagan sportchilar esa 20 reyting ochkosiga ega bo‘lishadi.
Ma'lumot uchun, Jahon Gran-Prisi to‘rtta yirik musobaqadan iborat bo‘lib, birinchi turnir Moskva shahrida, ikkinchi musobaqa Turkiyaning Samsun shahrida o‘tkazildi. Jahon Gran-Prisining yakuniy final musobaqasi dekabrda Meksikada bo‘lib o‘tadi.