Angela Merkel Xitoyga rasmiy safarini boshladi

Germaniya kansleri Angela Merkel va XXR davlat kengashi bosh vaziri Li Ketsyan ikki tomonlama muzokaralarni boshladi. Bu haqda Sinxua agentligi xabar bermoqda.

Mazkur tashrif Germaniya kanslerining Xitoyga sakkizinchi rasmiy safari hisoblanadi. Bu esa ikki davlat o‘rtasidagi hamkorlikning yaxshi yo‘lga qo‘yilganligini anglatadi.

Merkelning safari 30 oktabrga qadar davom etadi va u tashrif doirasida Xitoy rahbari Si Tszinpin bilan uchrashishi rejalashtirilgan.

Avvalroq Xitoydagi GFR elchisi Mixael Klasus Global Times gazetasiga bergan intervyusida, muzokaralar davomida ikki tomonlama iqtisodiy hamkorlik, Xitoy iqtisodiyoti holati, ochiqlikni ta'minlash sohasida olib borilayotgan islohotlar muhokama etilishini aytib o‘tgan. Shuningdek, xalqaro miqyosdagi muammolar, xususan Suriyadagi vaziyat, Ukraina masalasida ham muhokamalar bo‘lib o‘tishi mumkin. Elchi Xitoy tomoni Yevropadagi muhojirlar muammosi haqida qiziqishi mumkinligini ham aytib o‘tgan.