Saudiya Arabistoni Qirolligi 2015 yilgi haj mavsumida Birlashgan Millatlar Tashkilotiga Ka'bapo‘shning bir bo‘lagini sovg‘a qildi, deb yozadi Muslim.uz portali. Muqaddas kisva(ka'bapo‘sh)ni Qirollikning BMTdagi doimiy vakili Abdulloh Al-Muallimiy topshirdi.
Xalqaro tashkilot bosh kotibi Pan Gi Mun tuhfani qabul qilib olar ekan: “Makkai mukarramadan Nyu-Yorkdagi qarorgohimizga yuborilgan bebaho sovg‘a uchun minnatdorlik izhor etishga izn bergaysiz. Islom madaniyatining bir parchasini saqlash tashkilotimiz uchun faxrdir.”, - deb, minnatdorchilik bildirdi.
Eslatib o‘tamiz, ka'bapo‘sh bo‘lagi BMTga ilkbor 1980 yilda hadya qilingan.
Ma'lumot uchun aytib o‘tmoqchimiz, Ka'bapo‘sh – ellik bo‘lakdan iborat ipak mato bo‘lib, undagi bitiklar tilla suvi yurgizilgan ip bilan tikiladi. U har yil Zulhijja oyining 9-kuni, hojilar Mino vodiysidan Arafot tog‘iga yo‘l olgan paytda almashtiriladi. Almashtirilgan Ka'bapo‘sh bir necha bo‘laklarga bo‘linib, boshqa davlatlardagi martabali shaxslar va turli xalqaro tashkilotlarga tuhfa sifatida tarqatiladi.