Malida 3 kunlik motam va 10 kunlik favqulodda rejim holati amalda bo‘lishi e'lon qilindi. Bu haqda mamlakat prezidenti Ibrohim Bubakar Keyta Bamakoda 20 noyabr kuni amalga oshirilgan terakt bo‘yicha ma'lumotlarni ma'lum qilish vaqtida aytib o‘tgan.
20 noyabr kuni poytaxtdagi Radisson Blu mehmonxonasiga Kalashnikov avtomatlari bilan qurollangan shaxslar bostirib kirishi oqibatida asosan xorijliklar yashaydigan bu mehmonxonada 19 kishi halok bo‘lgani (ularning ichida mehmonxona xizmatchilari ham bor) ma'lum qilingan. Shuningdek, 7 kishi jarohatlangan, ulardan 3 nafari qutqaruv amaliyotida ishtirok etgan huquq tartibot organlari xodimlaridir.
Eslatib o‘tamiz, 20 noyabr kuni ertalab Mali poytaxti Bamako shahridagi Radisson Hotel Bamako mehmonxonasiga jangarilar bostirib kirdi va 170 kishini asirga oldi.
Garovdagilarni qutqarish uchun o‘tkazilgan amaliyotda Fransiya va AQSh, shuningdek BMT tinchlikparvar kuchlari vakillari ishtirok etishgan.
Bu hujum uchun javobgarlikni "Al-Qoida"ning Afrikadagi bo‘limlaridan biri "Al-Murabitun" guruhi o‘z zimmasiga olgan.