"Arsenal" jamoasi himoyachisi Per Mertezaker YeChLning 5-turida Zagrebning "Dinamo" klubiga qarshi o‘tkaziladigan bahsdan oldin jurnalistlar bilan gaplashdi.
"Biz ushbu turnirda uzoqroqqa borishni istaymiz. Hozirgi vaziyatdan kelib chiqib aytadigan bo‘lsak, bu maqsadga erishish oson bo‘lmaydi.
Axir YeChLning har bir uchrashuvida g‘alaba qozonish oson ish emas. Hozirda imkoniyatlarimiz biroz past bo‘lishiga qaramay, oxirigacha kurashishda davom etamiz.
Guruhdan chiqish uchun imkoniyatlar saqlanib qolgan. Biz uy uchrashuvida shuni inobatga olgan holda, o‘yinga jiddiy munosabat bilan yondoshamiz.
Bundan buyog‘iga xato qilishga umuman haqqimiz yo‘q.
Unutmaslik kerakki, biz o‘z maydonimizda YeChLning joriy mavsumida Yevropaning eng kuchli jamoalaridan biri "Bavariya"ni yengdik. Biz yana bir shunday zo‘r o‘yin ko‘rsatishimiz kerak", - deydi germaniyalik futbolchi.
YeChLning guruh bosqichida F guruhidan o‘rin olgan "kanonirlar" 4-tur o‘yinlari natijasiga ko‘ra 3 ochko bilan uchinchi o‘rinda turibdi. 5-turda o‘zaro uchrashadigan "Bavariya" va "Olimpiakos" jamoalarida 9tadan ochko mavjud. Zagrebning "Dinamo" jamoasi esa 3 ochko bilan to‘rtinchi o‘rinda.