Meksikalik narkobaron, El Chapo (Pakana) laqabi bilan mashhur Xoakin Gusman IShID terrorchi guruhi yetakchisi Abu Bakr al-Bag‘dodiyga elektron pochta orqali maktub jo‘natdi. Unda narkobaron jangarilarga uning “moli” partiyasi yo‘q qilingani uchun tahdid solgan. Bu haqda Sick Chirpse internet portali xabar bermoqda.
Ayni kunlarda qidiruvda bo‘lgan “Sinaloa” karteli rahbari IShIDning xatti-harakatlaridan noroziligini bildirgan. O‘z maktubida u terrorchilarning kartelning Yaqin Sharqdagi biznesiga aralashishga bo‘lgan urinishlarini jiddiy xato deb baholagan.
El Chapo uning odamlari IShIDdan “qarz uzib qo‘yishlari”ni va, agarda jangarilar yana narkooperatsiyalarga aralashsa, ularni yo‘q qilishini aytib ogohlantirgan.
El Chapo shu yilning 12 iyul kuni Meksika qamog‘idan qochib ketdi. Uni olib chiqish uchun 10 m chuqurlikda 1.5 km li tunnel qazilgani aniqlandi. 14 iyul kuni Meksika hukumati El Chaponi ushlashga yordam beradigan ma'lumotlarni yetkazgan odamga 4 mln dollar mukofot e'lon qildi.