Ashxobodda BMT Bosh assambleyasi tomonidan Turkmanistonning doimiy betaraflik maqomi tan olinganining 20 yilligiga bag‘ishlangan “Betaraflik siyosati: tinchlik, xavfsizlik va taraqqiyot yo‘lida xalqaro hamkorlik” mavzuida xalqaro konferensiya bo‘lib o‘tmoqda. O‘zbekiston Respublikasi Prezidenti Islom Karimov Turkmaniston Prezidenti Gurbanguli Berdimuhamedovning taklifiga binoan mazkur tadbirda ishtirok etish uchun 11 dekabr kuni Ashxobod shahriga keldi.
12news.uz yangiliklar agentligi muxbiri Shuhrat Oripovning Kun.uz cayti tahririyatiga xabar berishicha, xalqaro konferensiya ishida qator davlatlar yetakchilari, hukumatlar va parlamentlar rahbarlari, xalqaro va mintaqaviy tuzilmalarning vakillari ishtirok etishi ko‘zda tutilgan.
Mazkur xalqaro tadbirni 100 yaqin xorijlik jurnalist voqea joyidan yoritib bormoqda. Ma'lum bo‘lishicha, bugun Ashxobodda xalqaro konferensiyadan tashqari madaniyat va san'at ustalarining konsert dasturi ham bo‘lib o‘tadi.
1995 yil 12 dekabrda Birlashgan Millatlar Tashkiloti Bosh assambleyasi tomonidan “Turkmanistonning doimiy neytraliteti” deb nomlangan 50/80 raqamli Rezolyutsiya qabul qilingan edi va bu huquqiy hujjat jahonning 185 ta davlati tomonidan qo‘llab-quvvatlangan.
Betaraflik (neytralitet) lotincha “neuter” so‘zidan olingan bo‘lib, “u tomon ham, bu tomon ham emas” degan ma'noni bildiradi. Xalqaro huquqda betaraf deb urushlarda ishtirok etmaydigan, tinchlik vaqtida esa harbiy bloklar faoliyatida qatnashmaydigan mamlakatlarga aytiladi. Bugungi kunda jahondagi 8 ta mamlakat – Avstriya, Irlandiya, Kosta-Rika, Lixtenshteyn, Malta, Shveytsariya, Shvetsiya va Turkmaniston betaraflik maqomiga ega.
Turkman betarafligining o‘ziga xos jihatlaridan biri shundaki, dunyodagi o‘zini betaraf deb e'lon qilgan boshqa davlatlardan farqli ravishda faqat Turkmanistongina bunday huquqiy maqomga BMT Bosh assambleyasi Rezolyutsiyasiga asosan erishgan. Shuni ham ta'kidlash joizki, BMT tomonidan betaraflikning qo‘llab-quvvatlanishi ushbu xalqaro tuzilmaning yarim asrdan ortiq vaqt mobaynidagi faoliyati tarixidagi kamyob hodisalardan biri hisoblanadi.