Yevro-2016 turniri g‘olibi 27 mln yevro mukofot oladi

2016 yili Fransiya maydonlarida o‘tkaziladigan Yevropa chempionatining umumiy sovrin jamg‘armasi 301 millionni tashkil etadi, g‘olib esa shundan 27 millioniga ega bo‘ladi. Bu haqda 11 dekabr kuni o‘tkazilgan matbuot anjumani vaqtida UYeFA bosh kotibi Janni Infantino ma'lum qildi.

Uning bildirishicha, turnirda ishtirok etishning o‘zi uchun har bir terma jamoaga 8 million yevrodan beriladi. Turnirdagi har bir g‘alabali o‘yinga 1 million yevrodan, durang uchun esa 500 ming yevrodan taqdim etiladi.

Pley-off bosqichidagi natijalar uchun alohida bonuslar ajratilmagan. Buning o‘rniga nimchorak finaldagi ishtirok uchun 1,5 mln, chorak finalchilarga esa 2,5 mln yevrodan mablag‘ beriladi. Yarimfinalchilar 4 mln yevrodan olishadi. 10 iyul kuni Parijdagi "Stad de Frans" o‘yingohidagi finalni yutgan terma jamoaga esa 8 mln, yutqazgan finalchiga esa 5 mln yevro berilishi ko‘zda tutilgan.

Qayd etish kerakki, turnirda bu safar ishtirokchi jamoalar soni 16tadan 24tagacha oshirilgan. 2012 yilda turnirning mukofot jamg‘armasi 198 million yevro bo‘lgandi.