KXDR yetakchisi Kim Chen Inga bag‘ishlangan “Uning ezguligi” va “Izingizdan abadiy boramiz” qo‘shiqlari mamlakatda keng ommalashdi. Bu haqda Shimoliy Koreya Markaziy Telegraf agentligi xabar berdi.
Agentlik o‘tayotgan yilning mahalliy shoirlar va bastakaorlar tomonidan tayyorlangan vatanparvarlik ruhidagi eng yaxshi qo‘shiqlari ro‘yxatini e'lon qildi. Qayd etilishicha, ular orasida Koreya Mehnat partiyasi tashkil topganining 70 yilligiga bag‘ishlangan “Biz Pektusan tog‘iga yo‘l oldik”, “Hayotimizni tiksak-da inqilobiy ishonchdan voz kechmaymiz” qo‘shiqlari ham joy olgan.
Mazkur ro‘yxatdan partiya yubileyi munosabati bilan Pxenyandagi Tedongan daryosi qirg‘og‘ida 10 ming artist ishtirokida ijro etilgan qo‘shiq ham joy olgan.
Agentlik ikkita ayollar ansambli – "Moranbon" va "Chxonbon"ning konsert faoliyatiga katta baho berdi.