O‘zbekistonni Xitoy bilan bog‘lovchi yangi temir yo‘l qurilishi 2016 yilda boshlanadi

Xitoy–Qirg‘iziston–O‘zbekiston yo‘nalishi bo‘yicha yangi temir yo‘l qurilishi 2016 yilda boshlanadi. Bu haqda Qirg‘iziston Bosh vaziri Temir Sariyev «Birinchi radio» radiokanaliga bergan intervyusi chog‘ida ma'lum qilgan, deb yozmoqda mamlakat Hukumati rasmiy sayti.

«Xitoy-Qirg‘iziston-O‘zbekiston temir yo‘l yo‘nalishi qurilishi bizga dengizga chiqish imkoniyatini yaratadi. Hozirgi vaqtda mazkur loyiha Xitoy tomonidan ko‘rib chiqilmoqda. XXR mazkur loyihani qisqa muddatda foydalanishga topshirilishi uchun barcha mavjud imkoniyatlarni ishga solishini bildirgan»,- deydi Temir Sariyev.

Uning so‘zlariga ko‘ra, Xitoydagi tezyurar poyezdlar mamlakatdagi deyarli barcha hududlarni o‘zaro bog‘lab turadi.

«Temir yo‘l qurilishi bizga iqtisodiyotimizning o‘sishi uchun turtki bo‘lib xizmat qiladi. Bundan tashqari loyiha ichida mazkur loyihaga aloqador infrastruktura obektlarini qurish rejalashtirilgan», – deya ta'kidladi hukumat rahbari.

Temir Sariyevning qayd etishicha, mazkur loyihalarning barchasi Buyuk Ipak yo‘lining iqtisodiy yo‘nalishi dasturi asosida amalga oshirilmoqda.

«Agar temir yo‘l qurilishi loyihasi o‘z vaqtida foydalanishga topshirilsa, tez orada Qirg‘iziston orqali tranzit yo‘li bilan yiliga 15-20 mln tonna yuk tashib o‘tiladi. Keyinchalik mazkur temir yo‘l yo‘nalishini Eronga qadar uzaytirish rejalashtirilgan», – deya qo‘shimcha qilib o‘tgan Temir Sariyev.