2027-yil 1-yanvardan boşlab, Rossiyada birga yaşayotgan voyaga yetmagan farzandlari bölgan mehnat migrantlari patent uçun köproq haq tölaydi. Bu haqda IIV rahbari Vladimir Kolokolsev Federatsiya Kengaşidagi çiqişida maʼlum qildi, deb xabar berdi «Interfaks». Tegişli qonun 2026-yil 26-iyulda imzolangan.
Gap yangi soliq joriy etilişi haqida emas, balki çet ellik fuqaro patent uçun tölaydigan JŞODS (NDFL) böyiça amaldagi qatʼiy belgilangan avans tölovi miqdorini oşiriş haqida bormoqda. Mehnat migranti qaramoğidagi har bir voyaga yetmagan bola uçun tölov 50 foizga oşadi. «Klerk.ru» naşrining qayd etişiça, boşqa qaramoğidagilar uçun ham xuddi şunday ustama nazarda tutilgan. Agar bolani bir vaqtning özida bir neçta çet ellik taʼminlab kelayotgan bölsa, qöşimça tölovni ularning özaro kelişuvi tanloviga köra faqat birisi tölaydi.
Hozir tölov miqdori quyidagi formula böyiça hisoblanadi: 1 200 rubl × deflyator koeffitsienti × hududiy koeffitsient. 2026-yilda Moskvada bu körsatkiç oyiga 10 000 rublni taşkil etadi. Agar uşbu stavkalarga asoslanilsa, bir bola uçun ustama tölov oyiga taxminan 5 000 rublni, ikki bola uçun esa taxminan 10 000 rublni taşkil qiladi. 2027-yil uçun yakuniy summalar deflyator va hududiy koeffitsientlar tasdiqlangaç maʼlum böladi.
Qonun çet elliklarning boşqa toifalari uçun ham qoidalarni özgartirmoqda. Jismoniy şaxslar qölida işlaydiganlar, jumladan enagalar va qariyalarga qarovçilar ham qatʼiy belgilangan avans tölay boşlaydi. Ular uçun bazaviy stavka oyiga 1700 rublni taşkil etadi. Taşkilotlarda, YATT, notarius va advokatlar huzurida patent asosida işlovçilar uçun esa baza avvalgidek 1 200 rubl darajasida qoladi.
Patent bekor qilingan taqdirda, migrant 15 kun içida farzandlari bilan birga Rossiyani tark etişi şart böladi.
Kolokolsev statistik maʼlumotlarni ham keltirib ötdi. 2025-yildan buyon migrantlarning işlamaydigan va öqimaydigan oila aʼzolari soni 20 foizga kamaygan. Ötgan yili xorijlik işçilar patentlar uçun byudjetga 172 milliard rubl ötkazgan bölib, bu bir yil oldingi körsatkiçdan 39 foizga köpdir. Vazirning sözlariga köra, uşbu yangi çora ijtimoiy sohaga tuşayotgan yuklamani kamaytirişga xizmat qiladi.
