AQSh Asad 2017 yil martida prezidentlikdan ketishini belgilab berdi

Oq Uy Suriya prezidenti Bashar Asad o‘z lavozimini 2017 yil martidan ertaroq bo‘shatmasligini e'tirof etdi. Bu haqda Suriya masalasi bilan shug‘ullanuvchi amaldorlar uchun tayyorlangan ichki hujjatda aytildi. Mazkur hujjat bilan Associated Press muxbiri tanishib chiqishga muvaffaq bo‘ldi.

Amerikalik mansabdorlar uchun tuzib chiqilgan grafikda 2017 yilning mart oyi Asad prezidentlikdan ketadigan vaqt sifatida ko‘rsatilgan, deb ta'kidlaydi u. Shuningdek, taxminan o‘sha vaqtdan boshlab uning qurshovidagi odamlar mamlakatni tark eta boshlaydi.

Grafik BMT tomonidan tasdiqlangan rejaga asoslangan bo‘lib, dastlab u 2015 yilning noyabrida Venada o‘tgan xalqaro konferensiyada o‘qib eshittirilgan edi. Loyihaga muvofiq, Suriyada yangi prezident va parlament saylovlari 2017 yilning avgustida bo‘lib o‘tadi, bunga qadar mamlakatni o‘tish davri hukumati boshqarib turadi.