Samvel Babayan: Biz turnirdagi eng qiyin guruhdan joy olganmiz

Qatar poytaxti Doha shahrida start olgan U-23 yoshlar o‘rtasidagi Osiyo chempionati "C" guruhi vakillari ishtirokida matbuot anjumani bo‘lib o‘tdi.

O‘zbekiston olimpiya terma jamoasi bosh murabbiyi Samvel Babayan Janubiy Koreyaga qarshi ilk o‘yindan oldin turnirdagi barcha jamoalar, jumladan O‘zbekiston U-23 terma jamoasi ham oliy maqsad – Olimpiada yo‘llanmasi uchun kurash olib borish uchun Qatarga kelganini ta'kidladi.

“Qatardagi turnir hozirgi kunda shu yoshdagi eng kuchli terma jamoalarni to‘pladi. Ular Osiyo futboli kelajagi deb ayta olaman. "S" guruhi esa turnirdagi eng kuchli guruh. Bu yerga barchamiz nima uchun kelganimizni bilamiz. Biz ham, o‘z navbatida o‘zimizning eng yaxshi o‘yinimizni ko‘rsatish va Olimpiada yo‘llanmasini qo‘lga kiritish uchun tashrif buyurdik”, - deydi Babayan.

“To‘g‘ri, biz Osiyo chempionati final bosqichiga yo‘llanmani qiyinchilik bilan qo‘lga kiritdik. Ammo, aytishim kerak, tarkib deyarli 50 foizga yangilandi. Bu bizga kelajakka optimistik ko‘z bilan qarashga sabab bo‘ladi. Tarkibimizdagi aksariyat futbolchilar yosh bo‘lishiga qaramay ancha iste'dodli futbolchilar deb ayta olaman. Ularning ko‘pchiligi 20 yoshgacha bo‘lgan Jahon chempionatida ishtirok etishdi. Tarkibimizni yoshartirganimizga qaramasdan, biz to‘g‘ri yo‘ldan ketayapmiz deb hisoblayman. Yana qaytaraman, biz yaxshi tayyorgarlik ko‘rdik va o‘z o‘yinimizni namoyish eta olsak, maqsadimizga erisha olamiz.

O‘zbekistonda iste'dodli va tajribali murabbiylar ko‘p. O‘zbekiston Futbol Federatsiyasi prezidenti meni olimpiya terma jamoasiga ham bosh murabbiy etib tayinlaganining sababi, avvalo milliy terma jamoa uchun qay darajada zaxiraga ega ekanligimizni aniqlab olish uchun. Sababi, bu futbolchilar, nafaqat milliy terma jamoa, balki o‘zbek futbolining ham kelajagidir. Qolaversa, milliy terma jamoaning o‘yin falsafasi, g‘oyasini olimpiya terma jamoasiga ham singdirish lozim deb o‘ylayman”, - dedi O‘zbekiston olimpiya terma jamoasi bosh murabbiyi.

Samvel Babayan shuningdek, har bir raqibning o‘yinini terma jamoa murabbiylar shtabi yetarlicha o‘rganganini alohida ta'kidladi.

“Barcha raqiblarimizning o‘yin uslublarini yetarlicha o‘rgandik. Hatto, aytishim mumkin ularning o‘yin falsafasini ham yaxshilab o‘rgandik. Taktik sxemalari borasida ham yetarli ma'lumotlarga ega bo‘ldik. Biz eng kuchli guruhdan o‘rin oldik. Aniq ayta olamanki, ushbu guruhdan o‘rin olgan to‘rt terma jamoadan biri uchta yo‘llanmadan birini qo‘lga kiritadi. Qolaversa, bunday qisqa muddatli turnirlarga alohida tayyorgarlik ko‘rish kerak. Har bir o‘yin muhim ahamiyatga ega. Shuning uchun, har bir raqibimizga qarshi, har bir o‘yinga xuddi finalda o‘ynayotgandek tushamiz”, - dedi Samvel Babayan.

Samvel Babayan: Olimpiya terma jamoasining vazifasi Rio yo‘llanmasini qo‘lga kiritish