Guus Xiddink: Terri hozir ham 30 yoshdagidek o‘ynamoqda

Angliyaning «Chelsi» futbol klubi bosh murabbiyi Guus Xiddink mamlakat chempionatining «Everton»ga qarshi kechgan uchrashuvidan (3:3) keyin jamoa sardori Jon Terrining o‘yiniga yuqori baho berib o‘tdi.

«Jon bugun nafaqat hisobni tenglashtirishi orqali, balki himoyada ham, hujumda ham ko‘rsatgan o‘yini, munosabati orqali jamoa uchun juda kerakli futbolchi ekanini ko‘rsata oldi. Uning jonini berib o‘ynashi juda katta narsa.

2009 yildagi Terri va bugungisi o‘rtasidagi farqni ko‘rmayapman. Faqat qandaydir testlar uning tezligi pasayganini ko‘rsatishi mumkindir, men buni hozircha ko‘rayotganim yo‘q. U butunlay tayyor, yaxshi mashg‘ulot olib bormoqda, yoshiga mos ravishda o‘z ustida ishlamoqda. U sekin o‘ynaydigan bo‘lib qolgan? Unaqa bo‘lishi mumkin emas!

Agar u bilan shartnomani uzaytirish haqida fikrimini bilmoqchi bo‘lsangiz, menimcha javobim kundek ravshan», – deydi Xiddink.

Eslatib o‘tamiz, shu yili 36 yoshga to‘ladigan Terri yozda erkin agent maqomini olishi kutilmoqda.