Nazarboyev Qozog‘iston xalqiga murojaat yo‘lladi

Qozog‘iston prezidenti Nursulton Nazarboyev mamlakat parlamentining quyi palatasiga navbatdan tashqari saylovlar o‘tkazish masalasi yuzasidan yig‘ilish o‘tkazdi. Oq O‘rda matbuot xizmatining ma'lum qilishicha, yig‘ilish chog‘ida prezident mamlakat xalqiga murojaat qilgan.

Yig‘ilishda bosh vazir Karim Masimov, prezident ma'muriyati rahbari, konstitutsion kengash raisi, bosh prokuror va boshqalar ishtirok etishgan.

Yig‘ilish davomida mamlakat rahbari Qozog‘iston xalqiga murojaat qilib, Majlis deputatlarining palatani tarqatib yuborish hamda muddatidan ilgari saylovlarni o‘tkazish borasidagi takliflari har tomonlama o‘rganib chiqilganini ta'kidlab o‘tdi.

“Shu kunlarda menga ushbu tashabbusni qo‘llaydigan ko‘plab xatlar va telegrammalar kelib tushmoqda, - dedi davlat rahbari. – Navbatdan tashqari saylovlar o‘tkazish fikriga siyosiy partiyalar, kasaba uyushmalari, nohukumat tashkilotlar, korxonalarning mehnat jamoalari, o‘quv dargohlari qo‘shilmoqda. Murojaatlarda keltirilgan argumentlar anchayin tushunarli, ularda mamlakatga bo‘lgan g‘amxo‘rlik, siyosiy kampaniyani tezroq tugatib, qo‘yilgan vazifalarning amaliy realizatsiyasiga o‘tish zarurati aks etgan”.

Shuningdek, Nazarboyev xalqaro vaziyatning murakkabligini esga olib, jahonda yangi reallik o‘rin egallab borayotganini eslatib o‘tdi. “Bu murakkab vaziyatda biz tushunimiz lozim bo‘lgan asosiy narsa: imkoniyatga qarab yashash, resurslarni tejash, ish o‘rinlarini saqlash, - ta'kidladi prezident. – Hukumat va parlament ushbu vaziyatda hamkorlikda ishlab, tezkor choralar ko‘rishi lozim”. Murojaatda mamlakat oldida turgan galdagi vazifalar aytib o‘tildi.