AQSh moliya vazirligi Putinni korrupsiyada aybladi

AQSh hukumatining fikricha, Rossiya prezidenti Vladimir Putin ko‘p yillardan buyon korrupsiya botqog‘iga botib bo‘lgan va asl daromadlarini yashiradi. Bu haqda moliya vazirining o‘rinbosari Adam Shubin BBC’ning “Panorama” dasturiga bergan intervyusida aytib o‘tdi.

“Men raqamlarni aytishga tayyor emasman, lekin aniq ayta olaman – Putin davlatdan yiliga 110 ming dollar miqdorida maosh olgan. Ammo bu ushbu inson daromadining to‘g‘ri tavsifi emas. U o‘z boyligining asl hajmini yashirishda katta tajribaga ega”, - dedi Shubin.

Shubin Putinning korruptsion sxemalarga aloqadorligini tasdiqladi. Uning ta'kidlashicha, AQSh hukumati bu haqda ko‘p yildan beri biladi. O‘z navbatida, Rossiya vakillari bu ayblovlarni inkor qilib kelmoqda.