Nazarboyev 15 aprel kuni O‘zbekistonga keladi

11-15 aprel kunlari Qozog‘iston prezidenti Nursulton Nazarboyev bir qator xorijiy mamlakatlar bo‘ylab tashriflarni amalga oshiradi. Bu haqda Oqo‘rda matbuot xizmati xabar tarqatgan.

Xususan, 11-12 aprel kunlarida Nazarboyev prezident Hasan Ruhoniy taklifiga ko‘ra Eron Islom Respublikasiga boradi.

Tashrif davomida 2014 yilning sentabrida Ruhoniy tomonidan Ostonaga uyushtirilgan tashrif vaqtida amalga oshirilgan kelishuvlarning amaliy jihatlari ko‘rib chiqiladi.

Bundan tashqari, tomonlar savdo-iqtisodiy, investitsiyaviy, qishloq xo‘jaligi, tranzit-transport sohalaridagi hamda xalqaro va hududiy xavfsizlik masalalaridagi o‘zaro hamkorlikni mustahkamlash masalasaini muhokama etishadi.

13-14 aprel kunlari Qozog‘iston rahbari Turkiya respublikasiga boradi.

Bu tashrif vaqtida u Turkiya rahbari Rajab Toyib Erdo‘g‘an bilan uchrashib, Ostona va Anqaraning asosiy yo‘nalishlardagi hamkorliklarini muhokama qilishadi. Bundan tashqari, ikki tomon delegatsiyasi "Adolat va tinchlik uchun birlik hamda sadoqat" mavzusidagi Sammitda ishtirok etadi. Shuningdek, tomonlarning biznes doiralari uchrashuvi o‘tkazilishi ko‘zda tutilgan.

15 aprel kuni Nursulton Nazarboyev O‘zbekiston respublikasiga keladi va mamlakat prezidenti Islom Karimov bilan uchrashadi.

Davlat rahbarlari uchrashuvi vaqtida O‘zbekiston va Qozog‘istonning ikki tomonlama munosabatlaridagi muhim jihatlari muhokama etilishi kutilmoqda.