Bahrayn TIV Eronni terrorchilar tayyorlashda aybladi

Bahrayn Tashqi ishlar vaziri shayx Xolid ibn Ahmad Al-Xalifaning parlament yig‘ilishida deputatlarning savollariga javob berish vaqtida ma'lum qilishicha, Eron Bahrayndagi ekstremistik guruhlardan o‘z maqsadlarini amalga oshirishda foydalanish uchun ularni shug‘ullantirmoqda.

"Eron o‘z lagerlarida terrorchi guruhlarni tayyorlaydi. Bu mamlakat Bahrayn hududiga qurol va portlovchi moddalar olib kiradi", deydi Al Xalifa.

Vazir Bahrayn Eronning o‘z ichki ishlariga aralashayotgani uchun tegishli choralarni qabul qilishi haqida aytgan.

Shu yilning boshida Bahrayn Saudiya Arabistoni va Eron ziddiyati vaqtida birinchi bo‘lib saudiyaliklar tarafini olgan va eronliklar bilan diplomatik munosabatlarini buzgan.

Bahrayn hukumatining hisoblashicha, 2011 yili mamlakatdagi shialarning sunniylardan iborat podshohlik hukumatiga qarshi o‘tkazgan norozilik namoyishi ortida Eron turadi.