Toshkent shahrining Uchtepa tumani fuqarolik holatlari dalolatnomalarini yozish (FHDYo) bo‘limining yangi binosi ochildi.
UzA bergan xabarga ko‘ra, yangi binoni bunyod etish uchun 907 million so‘mdan ortiq mablag‘ sarflangan.
Bino zamonaviy texnologiyalar, zarur anjomlar bilan jihozlangan, nikohlarni tantanali ravishda qayd etish uchun sharoitlar yaratilgan.
"Yangi binoda yaratilgan qulayliklar xalqimizga malakali va sifatli yuridik yordam ko‘rsatishga to‘la imkon beradi. Har bir fuqaroning tug‘ilishi, oila qurishi, farzand ko‘rishi kabi holatlarni qonuniy rasmiylashtirish, hujjatlar arxivini tegishli tartibda yuritish uchun barcha sharoit mavjud. “Sog‘lom ona va bola yili” Davlat dasturi ijrosi doirasida huquqiy-ma'rifiy tadbirlar ko‘lamini kengaytirish, ”Yosh oila quruvchilar maktabi”, “Oila dorilfununi” mashg‘ulotlari mundarijasini yanada boyitish, ularni ko‘rgazmali, interfaol usullar asosida o‘tkazish borasidagi rejalarimizni amalga oshirishga yanada keng yo‘l ochildi", deydi Uchtepa tuman FHDYo bo‘limi mudiri Nozima Abdusalomova.