Avstraliyadagi masjid shubhali tarzda yonib ketdi

Avstraliyaning Jilong shahrida (Viktoriya shtati) 18 mayga o‘tar kechasi shaharning asosiy masjidida kuchli yong‘in ro‘y berdi. Bu haqda AVS xabar tarqatgan.

Yong‘in tufayli masjid binosi jiddiy zararlangan, uning tomi butunlay yonib ketgan. Dastlabki ma'lumotlarga ko‘ra, yong‘in tufayli halok bo‘lganlar va jarohatlanganlar yo‘q. Mahalliy o‘t o‘chirish xizmati rahbari Mark Sinkinsonning ma'lumotiga ko‘ra, o‘t o‘chirish xizmati voqea joyiga yetib kelganida yong‘in bino bo‘ylab tarqalib bo‘lgandi.

"Biz bino qulab tushishidan qo‘rqib ichkariga kira olmadik. Shu tufayli o‘tni o‘chirish ishlari tashqarida turib amalga oshirildi", degan u.

Masjid yaqinida yashovchi kishilarning guvohlik berishicha, yong‘indan oldin hududda kuchli portlash ovozi eshitilgan.

"Ayni vaqtda bu yong‘inning kelib chiqishi shubha uyg‘otmoqda. Viktoriya shtati politsiyasi bilan hamkorlikda tekshiruvlar o‘tkazamiz", deya qayd etgan Sinkinson.

Jilong shahri Melburnga yondosh joylashgan shahar bo‘lib, bu shaharda 185 ming kishi istiqomat qiladi.