Namanganda «Kitob olami» do‘koni foydalanishga topshirildi

21 may kuni Namangan shahrida O‘zbekiston matbuot va axborot agentligi Namangan viloyat hokimligi bilan yaqin hamkorlikida tashkil etilgan «Namangan kitob olami» majmuasining tantanali ochilish marosimi bo‘lib o‘tdi. Bu haqda matbuot va axborot agentligi rasmiy sayti xabar tarqatdi.

Ushbu tadbirni Namangan viloyat hokimi X. Bozorov ochib berdi. So‘ng O‘zbekiston matbuot va axborot agentligi Bosh direktori A. Yunusov so‘zga chiqib majmuaning oldida turgan maqsad va vazifalari, sohani rivojlantirish yo‘lida amalga oshirilgan ishlar haqida aytib o‘tdi. Tadbirda shuningdek, taniqli yozuvchi va shoirlar, san'atkorlar, Zulfiya mukofoti sovrindorlari ham ishtirok etishdi. 

«O‘zbekiston Respublikasi Prezidenti tomonidan e'lon qilingan «Sog‘lom ona va bola yili» Davlat dasturiga asosan xalq ma'naviyatini yuksaltirish, hamda adabiyotga, ma'naviyatga, milliy qadriyatlarni asrab-avaylash va ulug‘lash, yosh avlodning ongu shuuriga milliy mustaqillik g‘oyalarini singdirish va Ona - Vatanga yuksak sadoqat ruhida tarbiyalashga hissa qo‘shish, yoshlarni intellektual rivojlangan va ma'nan barkamol qilib voyaga yetkazish, aholining, ayniqsa yoshlarning milliy adabiyotimizga va jahon adabiyoti durdonalariga bo‘lgan qiziqishini qondirish hamda oilaviy kitob o‘qish an'analarini targ‘ib qilish, yozuvchi va kitobxon o‘rtasidagi muloqotni kuchaytirish maqsadida yurtimizning barcha mintaqalarida «Kitob olami» ma'rifiy majmuasining tarmoqlari ochilmoqda», deyiladi agentlik xabarida. 

Mazkur majmua 400 kvadrat metr maydonni egallagan, unda turli yo‘nalishdagi adabiyotlardan tarkib topgan ko‘rkam savdo javonlari o‘rnatilgan va ularga O‘zbekistondagi nashriyotlari tomonidan nashr etilgan 15 ming nusxadagi kitoblar joylashtirilgan. Shu bilan birga majmuada kitobxonlar xordiq chiqarishlari uchun qulay sharoitlar yaratilib «book-cafe» faoliyati tashkil etilgan.

Eslatib o‘tamiz, O‘zbekiston matbuot va axborot agentligi va Toshkent shahar hokimligi bilan 2015 yil 2 noyabrda Toshkent shahrida, hamda Qoraqalpog‘iston Respublikasi Vazirlar Kengashi bilan hamkorlikda 2016 yil 27 aprelda Nukus shahrida «Kitob olami» majmualari ochilgan edi.