Toshkent shahrida qish mavsumida gaz ta'minoti barqaror bo‘ladi

Toshkent shahrida 2016/2017 yil kuz-qish mavsumi oldidan gaz taqsimlash tarmoqlarini rekonstruksiya qilish bo‘yicha keng ko‘lamli ishlar amalga oshirilmoqda. Bu haqda O‘zA xabar bermoqda.  

“Toshkentgazta'minot” unitar korxonasining “Toshkentshahargaz” filialidan ma'lum qilishlaricha, gaz ta'minoti tizimini ta'mirlash va rekonstruksiya qilish bu yilgi kuz-qish mavsumiga tayyorgarlik ishlarining muhim jihatlaridan. Joriy yilda 18,4 kilometr gaz quvurini kapital ta'mirlash rejalashtirilgan. Yer osti gaz quvurlarini ta'mirlashda polietilen quvurlar tortishning zamonaviy «quvur ichida quvur» texnologiyasidan foydalanilmoqda.

Gaz nazorati punktlari gaz ta'minoti tizimining muhim bo‘g‘inlaridan biridir. Hozirgi kunda Toshkentda o‘rta va yuqori bosimli 1,5 ming gaz nazorati punktida tekshirish va profilaktika ishlari yakunlandi. O‘tgan yilning kuz-qish mavsumida ayrim mahallalarda gaz quvurlarida bosimning pastligi bilan bog‘liq muammolar yuzaga kelgan edi. Ularni hal qilish maqsadida qo‘shimcha gaz nazorati punktlari o‘rnatish va yangi quvurlar o‘tkazish ishlari bajarilmoqda. 

Aholining gaz ta'minoti bo‘yicha shikoyatlari texnik kengashda ko‘rib chiqilmoqda. Joriy yilda aholidan kelib tushgan arizalar o‘rganilib, gaz uskunalari texnik tekshiruvdan o‘tkazilgach, Mirobod tumanidagi Shahrisabz va Oybek ko‘chasidan o‘tadigan 1,5 kilometrlik gaz quvurini rekonstruksiya qilish to‘g‘risida qaror qabul qilindi.

Shahardagi gaz quvurlarining mustahkamligi va ish qobiliyatini tekshirish ishlari yakunlandi. Yer osti gaz quvurlari xizmatining zamonaviy uskunalar bilan jihozlangan mobil laboratoriya xizmati yordamida 870 kilometrlik gaz tarmog‘i tekshiruvdan o‘tkazildi.

Kuz-qish mavsumiga o‘z vaqtida va puxta tayyorgarlik ko‘rish poytaxtimiz gaz ta'minoti tizimining barqaror ishlashi, iste'molchilarga tabiiy gazni uzluksiz yetkazib berish kafolatidir.