Eronlik spiker: Rossiya samolyotlariga Hamadondagi aviabazadan foydalanish taqiqlanmagan

Eron Rossiya jangovar samolyotlarining Hamadondagi aviabazasidan parvozlarni amalga oshirishini taqiqlamagan. Bu haqda Eron parlamenti raisi Ali Larijoniyga asoslanib, RIA Novosti xabar berdi.

U Eron Rossiya bilan terrorizmga qarshi kurashda ittifoqchi hisoblanishini qayd etgan.

Larijoniy rossiyalik uchuvchilarning parvozlari to‘xtatilmaganini aytish bilan birga, na Rossiya va na boshqa biron davlat Eron Islom respublikasida doimiy bazaga ega bo‘lmasligini ta'kidlagan. U Hamadondagi Shahid Nuja bazasi hech kimga doimiy asosda berilmaganligi, balki faqat yoqilg‘i quyish uchun foydalanilishini qo‘shimcha qildi.

Eslatib o‘tamiz, avalroq Rossiya tomonidan Hamadondagi Shahid Nuja harbiy bazasidan foydalanilishi vaqtinchalik to‘xtatilganligi haqida ma'lum qilingan edi.

O‘tgan haftada Rossiya HHK samolyotlari ilk marta Hamadondagi aerodromdan chiqib, IShID marralarini bombalagandi.