«Emmi» taqdimotida «Taxtlar o‘yini» seriali eng asosiy mukofotni qo‘lga kiritdi

Yozuvchi Jorj Martinning «Muz va olov qo‘shig‘i» nomli turkum romanlari asosida suratga olingan, fentezi janridagi «Taxtlar o‘yini» (Game of thrones) seriali AQShning eng yaxshi televideniye dasturlari mukofoti 68-«Emmi»ning bosh sovrindori bo‘ldi. Mukofot serial rejissyori Migel Sapochnikka topshirildi.

Serial efirga uzatilayotgan 6 yil mobaynida qatorasiga ikkinchi marta «eng yaxshi drama» nominatsiyasida g‘olib bo‘ldi. Serial shu vaqtgacha olgan mukofotlari soni 38taga yetdi.

Serial 2011 yilning aprelidan buyon Time Warner tizimiga kiruvchi HBO telekanali orqali namoyish etib kelinmoqda. Hozirgacha afsonaning 6 mavsumi namoyish etilgan, yettinchi mavsumni suratga olish ishlari boshlangan. Yettinchi mavsum premerasi 2017 yil 24 aprel kuni bo‘lib o‘tishi kutilmoqda.

Bu yo‘nalishda g‘oliblik uchun "Daunton abbatligi" (Downton Abbey), "Kartadan qurilgan uy" (House of Cards), "Yaxshisi Saulga qo‘ng‘iroq qil" (Better Call Saul), "Vatan" (Homeland), "Mister Robot" (Mr. Robot) va Amerikadagi KGB agentlari tarixidagi "Amerikaliklar" (The Americans) seriallari ham da'vogarlik qilgandi.

Siyosiy janrdagi «Vitse-prezident» (Veep) eng yaxshi komediya deb topildi. 

«Emmi» mukofoti 1949 yildan buyon har yili topshirib kelinadi va «Oskar»ning televizion ekvivalenti hisoblanadi.