Adabiyot bo‘yicha Nobel mukofoti sovrindori shvetsiyalik mutaxassislarni esankiratib qo‘ydi

Shvetsiya akademiyasining 2016 yilgi adabiyot bo‘yicha Nobel mukofotini AQShlik bastakor, qo‘shiqlar ijrochisi va muallifi Bob Dilanga berish qarori shvetsiyalik adabiy tanqidchilar va jurnalistlarni, bu mukofot Dilanga berilishi bir necha yildan beri bashorat qilinayotganiga qaramasdan, esankiratib qo‘ydi.

Bu mukofot Dilanga "buyuk amerika an'analarida yangi she'riy ifodalarni yaratgani" uchun berildi.  

"Mening gapirishga tilim aylanmay qoldi, haqiqatda aylanmay qoldi. Barcha to‘siqlar barbod bo‘ldi. Bu adabiyotni umuman yangicha tushunishdir", deb aytdi SVT shved televideniyesining adabiy tanqidchisi Ulrika Milles mukofotning berilishini jonli efirda sharhlash vaqtida.

"Uning juda yaxshi qo‘shiqlari bor, biroq bu she'riyatning yaxshiligini bilmayman", deb aytdi Nobel mukofotlari bo‘yicha mutaxassis  Svante Veyler.

Shvetsiya akademiyasining muqim kotibi Sara Danius mukofotning Dilanga berilishiga izoh berib, bu qarorga bir ovozdan kelinganini aytdi.

"U ijro qilish uchun mo‘ljallangan she'rlar yozadi. Bunda Dilan ijodi ildizlari bilan qadimiy greklar an'analariga qarab ketadi, ularning she'riyati ham ma'lum usulda ijro etilgan. Dilanning ijodiyotida chuqur an'analar aks etgan, ular yuqori badiiy darajada musiqa bilan uyg‘unlashtirilgan", deb aytdi Danius.

Bob Dilan – amerikalik qo‘shiqchi va qo‘shiqlar matni muallifi. Uning "Blowin' in the Wind", "The Times They Are a-Changin", "Knockin' on Heaven's Door" deb nomlangan qo‘shiqlari amerika aksilharbiy harakati va fuqarolik huquqlari madhiyalariga aylangan.   

Adabiyot bo‘yicha Nobel mukofoti uning asoschisi Alfred Nobel tomonidan berilishi vasiyat qilingan beshta mukofotdan biri hisoblanadi. Mukofotni topshirish marosimi 10 dekabrda Nobelning vafot etgan kunida o‘tkaziladi. Bu yilgi Nobel mukofoti miqdori 8 mln shved kronini (932 ming AQSh dollari) tashkil qilmoqda.