Fizikadan ma'lumki, dunyodagi turfa ranglar asosan 7 xil tus qorishmasidan hosil bo‘ladi. Pantone Color Institute ekspertlari o‘z mutaxassisliklaridan kelib chiqqan holda 2017 yilning asosiy rangini e'lon qildi, deb xabar qilmoqda Associated Press agentligi. Unga ko‘ra, kelasi yilda sariq tusga yaqinroq och yashil rang urf bo‘ladi.
Institut vitse-prezidenti Lori Pressmanning bayonot berishicha, AQSh siyosiy jihatdan tarqoq holga kelgan, bu narsa dunyoning turli burchagida, masalan, Buyuk Britaniya va Italiyada ham kuzatilmoqda.
Ta'kidlash joizki, institut ekspertlari 1999 yildan beri har bir yildagi urf hisoblanuvchi rangni aniqlab keladi. 2017 yilning rangi bahorgi tabiatga xos hisoblanadi. Shu bilan birga, u 1960-70 yillardagi norozilik harakatlarining o‘ziga xos timsoli ham bo‘lgan.
2016 yilning asosiy rangi sifatida «pushti kvars» va moviy tus belgilangan. 2015 yilda «marsala» tusi edi.
Pantone har yilning dekabr oyida kelasi yilning eng ommabop rangini aniqlaydi. Dizaynerlar va chakana savdo bilan shug‘ullanuvchilar bu xabarni diqqat bilan kuzatishadi.