“Mahallada duv-duv gap-2” kinofilmi haqidagi tafsilotlar ma'lum qilindi

Barchamiz uchun qadrdon bo‘lgan “Mahallada duv-duv gap”, “Sen yetim emassan”, “Olovli yo‘llar” kabi ko‘plab kinofilmlarni tomoshabinlarga taqdim etgan, “El-yurt hurmati” ordeni va “Shuhrat” medali sohibi Shuhrat Abbosov rejissyorligida “Yana mahallada duv-duv gap - 2” badiiy filmini tasvirga olish ishlari yakunlanib qoldi. Film “Dono Productions” kinokompaniyasi tomonidan suratga olinmoqda. Bu haqda Kun.uz’ga kinokompaniya vakillari ma'lum qildi.

“Mahallada duv-duv gap - 2” kinofilmining asosiy voqealari Farg‘ona viloyati (Farg‘ona, Marg‘ilon, Qo‘qon shaharlari, Rishton, O‘zbekiston tumanlari) va Toshkent shahrida tasvirga olindi. Bosh qahramon, mahalla fuqarolar yig‘ini raisi – Xosiyat opa va uning uch nafar o‘g‘li atrofida ro‘y beradigan voqealar orqali, umuman respublikamizda so‘nggi yillarda amalga oshirilgan ulkan bunyodkorlik ishlari, mahalliy aholi ongida ro‘y bergan ma'naviy o‘zgarishlar, ertangi kunga bo‘lgan ishonchning ortishi jarayoni yuksak badiiy mahorat bilan tasvirlanadi. 

Filmda bosh qahramon rolini Dilbar Ikromova, uning uch o‘g‘lini – yosh aktyorlar Erkin Bozorov, Sur'at Islomov, Abbos Ibragimovlar gavdalantirgan. 

Aktyorlar jamoasi tarkibida Husan Sharipov,Gulchehra Jamilova, Muqaddas Holiqova, Muyassar Berdiqulova, Madina Muxtorova, Valijon Shamsiyev, Dilshodbek Kattabekov, Mohira Nurmatova, Shodiya To‘xtayeva, Shirin Ismoilova, Laziza Nozimxonova, Zebiniso Holiqova, Kumush O‘ktamova kabi o‘nlab xalqimiz suygan ijodkorlar bor. 

Postanovkachi rejissyorlar – Shuhrat Abbosov va Nozim Abbosov. Stsenariy muallifi – Shoira G‘iyosova. Ikkinchi rejissyor Farhod Xudoyberdiyev. 

Ma'lumotlarga ko‘ra, tasvirga olish guruhi qariyb 70 kundan buyon s'yomka jarayonlarida mehnat qilmoqda.