Muslima ayol nasroniyga turmushga chiqsa bo‘ladimi?

Muxlis.uz sayti ma'muriyatiga quyidagi savol bilan murojaat qilindi:

“Assalomu Alaykum qori aka! Mening Rossiyada bir tanishim bor. Millati o‘zbek, muslima. U rossiyalik bir rus odamga turmushga chiqqan. Biroq, turmush o‘rtog‘i nasroniy dinida. Islom dini bunga qanday qaraydi?”

Bunga esa shunday javob qaytarildi:

“Va alaykum assalom. Musulmon erkak muslimaga, shuningdek, ahli kitobdan bo‘lgan pokiza (yahudiy yoki nasroniy) ayolga uylansa bo‘ladi. Alloh taolo bunga ruxsat bergan. Lekin muslima ayol faqat musulmon erkakka turmushga chiqadi, g‘ayridin kishi bilan oila qurishi joiz emas. Nega, deyilsa, musulmon erkak ahli kitob turmush o‘rtog‘i haqini ado etadi, ammo g‘ayridin erkak muslima haq-huquqlariga e'tibor bermasligi, unga zulm qilishi, imon-e'tiqodiga ziyon yetishi mumkin. Qolaversa, farzand tarbiyalashda ham otaning o‘rni muhim bo‘lib, muslima ayoldan tug‘ilgan bolalar g‘ayridin otaga o‘xshashga, undan o‘rnak olishga harakat qiladi. Shu va boshqa sabablar bilan muslima ayolning g‘ayridin kishi bilan turmush qurishiga ruxsat etilmaydi. 

Qolaversa, o‘zbek ayollarining o‘zbekona madaniyatimiz va mentalitetimizga to‘g‘ri kelmaydigan muhitda yashaydigan ajnabiy kishilar bilan oila qurishlari tug‘ilajak farzandning milliy ruhda o‘sib-ulg‘ayishiga ham to‘g‘anoq bo‘lishi mumkin”.