AQShda prezident yadroviy zarba berishini taqiqlovchi qonun loyihasi ko‘rib chiqiladi

AQSh kongressiga prezidentga biror davlatga urush e'lon qilmasdan, yadroviy zarba berishni taqiqlovchi qonun loyihasi ko‘rib chiqish uchun kiritildi. Bu haqda Foreign Policy xabar bermoqda. 

Qonun loyihasi mualliflari senator-demokrat Edvard Marki va kongressmen-respublikachi Ted Lyu hisoblanadi. Ta'kidlanishicha, bunday taqiqlov sobiq prezident Barak Obama vaqtida muhokama qilina boshlagan va hech qanday natijaga olib kelmagan. Biroq  Donald Tramp hokimiyat tepasiga kelishi bilan bu masala bo‘yicha muzokaralar yana boshlandi.

"Yadroviy urush insoniyatga jiddiy tahdid qiladi. Ayni vaqtda prezident Tramp terrorchilarga qarshi yadroviy zarba berish mumkinligini taxmin qildi. Afsuski, AQSh qonunchiligi ixtilof vaqtida  ogohlantiruvchi zarba berish imkoniyatini qoldirib, prezidentga bunday huquqni beradi", deb aytdi senator Marki.

Uning fikricha, boshqa yadroviy davlat bilan ixtilof vaqtida yadroviy urush tahdidi oshadi.

"Kongress dunyoda barqarorlikni saqlab qolish uchun harakat qilishi kerak va AQSh qanday holatlarda yadroviy zarba beradigan birinchi davlat bo‘lishi shartlarini aniq ko‘rsatishi lozim", deb ta'kidlab o‘tdi kongressmen Lyu.

Avvalroq Rossiya prezidenti matbuot kotibi Dmitriy Peskov AQSh va Rossiya o‘rtasida yadroviy kurolni simmetrik tarzda qisqartirishning imkoni yo‘qligini aytgandi.