AQSh Davlat kotibiga Bonndagi mehmonxonalarda joy topilmadi

«Katta yigirmatalik» davlatlari tashqi ishlar vazirlarining ikki kunlik sammitida ishtirok etish uchun Shveytsariyaga kelgan AQSh Davlat kotibi Reks Tillersonga mehmonxonadan joy topilmadi. Bloomberg xabariga ko‘ra, shahardagi barcha mehmonxonalarda barcha xonalar band bo‘lgani uchun Tillersonga joy berilmagan.

Shundan so‘ng, uni Bonn shahridan 30 daqiqalik masofadagi sanatoriyaga joylashtirishgan. 

Qayd etilishicha, bu holatga Tillersonning uchrashuvda ishtirok etishi kechikib tasdiqlangani sabab bo‘lgan. Shu tufayli, sammit vaqtida Tillerson bilan uchrashmoqchi bo‘lgan boshqa vazirlar, shu jumladan Buyuk Britaniya Tashqi ishlar vaziri Boris Jonson sanatoriyagacha bo‘lgan yo‘lni bosib o‘tish uchun ortiqcha 30 daqiqa yo‘qotgan.

Shu kuni Tillerson va Rossiya TIV rahbari Sergey Lavrovning uchrashuvi vaqtida zaldan jurnalistlarni chiqarib yuborishgandi. Amerikalik siyosatchining faqat ilk so‘zlarini eshitishgan: «Salom. Rahmat, mister Lavrov, men ham sizni ko‘rib turganimdan mamnunman». Shundan so‘ng amerikaliklar delegatsiyasi jurnalistlarni «haydagan». Ular o‘z harakatlarini izohlashmagan.

Bu Tillerson va Sergey Lavrovning G20 TIV rahbarlari sammiti doirasidagi ilk uchrashuvi edi. Lavrov bu uchrashuv samarali va foydali kechganini ma'lum qildi.