Samsung rahbariga nisbatan sud qachon boshlanishi ma'lum

Samsung korporatsiyasining haqiqiy rahbari Li Chje Yon ishi bo‘yicha birinchi eshituvlar 9 mart kuni boshlanadi. U Janubiy Koreyada 2015 yilda kompaniyaning ikki filiali birlashishi davomida pora olganlikda gumonlanmoqda, deb xabar berdi Reuters agentligi sud bayonotiga asosan.

Avvalroq Janubiy Koreya sudi prokuraturaning Li Chje Yonni hibsga olish haqidagi murojaatini tasdiqladi, shundan so‘ng u qamoqqa olindi. Samsung rahbariyati esa maxsus bayonot bilan chiqdi. Unda kompaniya “bo‘lajak sud jarayonida barcha haqiqat aniqlanishi uchun qo‘lidan kelgan hamma harakatni bajarishi” aytilgan.

Tergovga ko‘ra, aynan Li Chje Yon mamlakat prezidenti Pak Kin Xening yaqin dugonasi – Chxve Sun Silga moliyaviy ko‘mak berish haqida qaror qabul qilgan. Bu hukumat tomonidan ma'lum yengilliklar berilishi evaziga qilingan. Xususan, korporatsiya Chxve Sun Sil va uning qiziga tegishli bo‘lgan hamda Germaniya ro‘yxatdan o‘tgan firma hisob raqamiga bu kompaniya tomonidan go‘yoki ko‘rsatilgan konsultatsiya xizmatlari evaziga 18 mln dollardan ko‘proq mablag‘ni o‘tkazib bergan. Shuningdek Chxve Sun Sil tomonidan tashkil etilgan nodavlat jamg‘armalarga yirik miqdorda mablag‘lar o‘tkazilgan. Tergovchilarning fikricha, Samsung buning evaziga, aksiyalari davlat pensiya jamg‘armasi tomonidan boshqarilgan bir qator bo‘linmalarining qo‘shilishini amalga oshirishda qo‘llab-quvvatlangan.