Toshkentdagi yangi uyning muammolari qachon hal etiladi?

O‘zbekistonda namunali uy-joylar qurilishi jadal sur'atlar bilan olib borilayotgani hech kimga sir emas. Toshkent shahrida ham katta loyihalar amalga oshirilmoqda. Jumladan, ulardan biri – 2015 yilda shaharning Eski shahar hududida O‘zbekiston Respublikasi birinchi prezidenti Islom Karimov g‘oyasi asosida Nurafshon ko‘chasi bo‘ylab yangi turar joylarning barpo etilishi. 

Albatta, bu uylar bugun butun shahar qiyofasiga ko‘rk bag‘ishlab turgani tayin. Biroq bu ishlarni ko‘zbo‘yamachilik uchun qiladiganlar ham bor ekan. Natijada yana oddiy xalq jabr ko‘rmoqda. 

Xususan, ushbu ko‘chadagi 23- va 24-uylar bugun juda abgor holatda. "AnvarQur" qurilish firmasi tomonidan qurilgan uylar ochiqchasiga firibgarlikdan boshqa narsa emas. 

Biz bilan suhbatlashgan yurtdoshlarimizning so‘zlariga ko‘ra, uyda suv umuman yo‘q, nasos ulanmagan degan turli bahonalar qilib kelinmoqda. Ba'zi bir xonadonlarda esa isitish tizimining o‘zi yo‘q. Derazatokcha, romlar esa qing‘ir-qiyshiq holatda. Bundan tashqari, yomg‘ir yog‘sa tomdan chakki ham o‘tishi aniqlandi. Uyni isitadigan qurilma yoqilsa esa uning barcha yeridan suv oqadi. Xullas, yangi xonadonlar hali egasiga topshirilmasdan juda yomon ahvolda.

Fuqarolar masalaga oydinlik kiritish maqsadida uy egasiga qo‘ng‘iroq qilsalar, u uyali telefon apparatini o‘chirib qo‘yar ekan. Biz ham suhbat davomida uy egalari bilan bog‘lanishga harakat qilib ko‘rdik. Biroq qo‘ng‘iroqlar befoyda bo‘lib chiqdi.

Yaxshiyamki, fuqarolar uyni qabul qilib olish xaqidagi hujjatga imzo chekmagan. Kezi kelganda yana bir gap. 2015 yil 15 avgust kuni O‘zbekiston Respublikasining birinchi prezidenti Islom Karimov Nurafshon ko‘chasidagi ushbu yangi turar joylarni ko‘rgani kelganda ayrim "aqlli" mutasaddilar barcha chiqindilarni 24 uyning yerto‘lasiga yashirgan ekan. Shu-shu o‘sha kundan yodgorlik sifatida bu chiqindilar 2 yildan beri yerto‘lada. Uyning ahvolini esa tasavvur qilavering. 

Yakunda esa qator savollar javobsiz qolmoqda. Bunday holatga kim javobgar? "Anvarqur"MChJmi, tuman hokimligimi yoki bank muassasasi? Bir so‘z bilan aytganda, muammolar qachon hal etiladi?

Youtube`da ko‘rish

Tas-Ix (Mover) da ko‘rish