Bugun Qozonda Aripov ishtirokida MDH hukumat rahbarlari kengashi yig‘ilishi o‘tkaziladi

Rossiyaning Qozon shahrida juma kuni MDH hukumatlari rahbarlari Kengashi va Yevroosiyo hukumatlararo kengashi yig‘ilishlari bo‘lib o‘tadi.

Rejaga ko‘ra, MDH hukumatlari rahbarlari Kengashi yig‘ilishida hamdo‘stlik doirasidagi o‘zaro harakatlarni rivojlantirish, tinch maqsadda atom energiyasidan foydalanish sohasidagi xalqaro kelishuvlar, geodeziya, kartografiya, kadastr va Yerni masofadan turib tadqiq etish, intellektual mulkni himoya qilish va kontrafakt mahsulotning tarqalishi kabi masalalar muhokama etiladi.

Yevroosiyo hukumatlararo kengash yig‘ilishida esa Rossiya, Armaniston, Belarus, Qozog‘iston va Qirg‘izistonni birlashtiruvchi ittifoq doirasidagi integratsion o‘zaro harakatlarga oid keng ko‘lamli masalalar ko‘rib chiqiladi.

Bundan tashqari, ittifoq bozorida cheklovlarni bartaraf etish bo‘yicha qo‘shma tadbirlar rejasini ma'qullash, raqamli kun tartibini amalga oshirish bo‘yicha asosiy yo‘nalishlarni tayyorlash ishlari va a'zo davlatlar tashqi iqtisodiy faoliyatini tartibga solish tizimida “yagona oyna” mexanizmini rivojlantirishni ham muhokama etish mo‘ljallangan.

Yevroosiyo hukumatlararo kengashi yig‘ilishida shuningdek, agrosanoat kompleksi sohasida hamkorlikdagi ilmiy-tadqiqot va tajribaviy-konstruktorlik ishlarini tashkil etish, sanoat mahsulotlariga nisbatan maxsus subsidiyalarni muvofiqlashtirish va o‘zaro manfaatli boshqa masalalar ko‘rib chiqiladi.

Avvalroq. Mustaqil Davlatlar Hamdo‘stligi hukumat rahbarlari kengashining navbatdagi yig‘ilishida O‘zbekiston Respublikasi bosh vaziri Abdulla Aripov boshchiligidagi delegatsiya ham ishtirok etishi haqida xabar bergandik.