Qozog‘iston yil so‘ngiga qadar yagona lotincha imloni qabul qiladi

Garchi avvalroq Qozog‘iston 2025 yilgacha lotin imlosiga asoslangan qozoq alifbosiga o‘tishi xabar qilingan bo‘lsa-da, jarayon tezlashtiriladiganga o‘xshayapti.

2017 yil so‘ngiga qadar Qozog‘istonda qozoq tilining yagona lotincha alifbosini qabul qilish kutilmoqda. Bu haqda 26 iyul kuni Qozog‘iston maorif vaziri Yerlan Sagadiyev xabar qilgan, deb yozadi Tengrinews.kz.

«Lotin alifbosiga o‘tish haqida to‘xtalsam. Bu o‘ta muhim loyiha. Bu yerda ehtiyotkor bo‘lib harakat qilish, xatoga yo‘l qo‘ymaslik kerak. Bu yil qilishimiz mumkin bo‘lgan yagona ish — barchani qoniqtiradigan alifboni qabul qilish. Buning uchun bir necha variantlar tayyorlanib, muhokamadan o‘tkazilib, ulardan birortasini qabul qilib, so‘ngra lotincha imloga o‘tish borasidagi rejalarni qurishimiz kerak. Buning uchun maxsus komissiya tuzilgan va u ish olib bormoqda», — degan vazir.

23 iyun kuni Qozog‘iston prezidenti Nursulton Nazarboyev qozoq tilini lotincha imloga o‘tkazishni cho‘zib o‘tirishdan ma'ni yo‘qligini e'lon qilgan edi.

«Biz buni tuzatish uchun ishga kirishdik. Qozoq tilini lotinchaga o‘tkazish bizni yanada jipslashtiradi. Men o‘z murojaatimda 2025 yilgacha muddat belgilagan edim, lekin bu jarayonni cho‘zish uchun asos ko‘rmayapman», — degan Qozog‘iston prezidenti.

Bungacha Markaziy Osiyo davlatlaridan Qirg‘iziston prezidenti Almazbek Atamboyev qirg‘izlar bundan o‘rnak olmasligi kerakligini ta'kidlab o‘tgan edi. «Biz o‘zimizda mavjud narsadan voz kechmasligimiz kerak. Agar nimanidir o‘zgartiradigan bo‘lsak, bizda qadimdan o‘z yozuvimiz bo‘lgan: runiy yozuvi — bitik qirg‘iz tiliga ko‘proq mos keladi. Lekin biz kirill imlosini saqlab qolishimiz kerak», — degan edi Atamboyev.