Suriya armiyasi 48 soat ichida IShID qamal qilayotgan Dayr az-Zorga yetib keladi

Suriya armiyasi harbiy xizmatchilari ikki kun ichida IShID terrorchilik guruhi jangarilari tomonidan to‘sib qo‘yilgan Dayr az-Zor shahriga yetib kelishadi. Bu haqda Dayr az-Zor viloyati gubernatori Muhammad Irohim Samra xabar berdi.

«Armiya qahramonlari Dayr az-Zorga maksimum 24-48 soat ichida yetib kelishadi», - deya gubernatorning so‘zlarini keltiradi Reuters agentligi.

Uning so‘zlariga ko‘ra, suriyalik askarlar ayni damda shahar chetidan taxminan 20 kilometr masofada qolmoqda.

Avvalroq Suriyadagi cho‘lda IShIDning 17 avtobusidan iborat konvoy to‘xtab qolgani xabar berilgandi.