Malayziya hukumati vakili Myanmadan jahon hamjamiyati e'tiroziga quloq tutishni talab qildi

Malayziya bosh vaziri o‘rinbosari Ahmad Zohid Homidiy Myanma rasmiylaridan Janubi-sharqiy Osiyo davlatlari assotsiatsiyasi (ASEAN) tomonidan bildirilgan e'tirozlarga befarq bo‘lmaslikni talab qilmoqda. Shuningdek, butun dunyo hamjamiyatining etnik kamchilikni tashkil qiluvchi rohingyalar inqiroziga bildirgan munosabati inobatga olinishi shart, deb hisoblaydi u. Bu haqda New Straits Times nashri xabar tarqatdi.

«ASEAN e'tiroziga quloq tutishlari lozim, atrofga boqing: insoniyat hayvoniy xislatlari bilan bir-birini qirib yubormoqda, axir», deb ta'kidlagan u.

Bundan tashqari, mamlakat Davlat maslahatchisi hamda Tashqi ishlar vaziri, de fakto Myanma rahbari Aun San Suning harakatsizligi, zimdan aksilharakat bilan ish tutishi, uning Myanmada inson qadriyatlari va demokratik tamoyillarni himoya qilish uchun olib borgan kurashlarini shubha ostida qoldirmoqda.

Malayziya hukumati rasmiy vakilining fikricha, rohingyalar huquqi diniy yoki etnik belgisiga ko‘ra poymol etilishiga yo‘l qo‘yish mumkin emas. Parlament saylagan, harbiy diktaturaga aloqasi yo‘q mamlakat prezidenti Txina Chjo esa rasmiy bayonot bilan mediada ko‘rinmayapti.