G‘oibnazarov navbatdagi jangni rossiyalik bokschiga qarshi o‘tkazadi. U 35 yoshda

Professional boksdagi faoliyatini muvaffaqiyat bilan davom ettirayotgan Fazliddin G‘oibnazarov navbatdagi jangini shu yilning dekabrida o‘tkazadi.

Sports.uz xabarida yozilishicha, u 9 dekabr kuni rossiyalik 35 yoshli sportchi Andrey Klimovga qarshi ringga ko‘tariladi.

Bundan avvalroq, uning to‘rtinchi raqibi meksikalik Aleksis Del Boske bo‘lishi haqida xabar berilgandi.

Jang Nyu-Yorkdagi afsonaviy Madison Square Garden arenasida bo‘lib o‘tadi.

Klimov 2009 yili professional faoliyatini boshlagan va shu vaqtgacha 23 marta jang o‘tkazib, 19 g‘alaba (9 nokaut) va 4 mag‘lubiyat qayd etgan. U faoliyati davomida Jahongir Rahimov, Abbos Anvarov va Bobir Normatov kabi o‘zbekistonlik bokschilar bilan to‘qnash kelgan hamda g‘alaba qozongan.

Bundan tashqari, Klimov 2013 yili jahon boksining ko‘zga ko‘ringan vakillaridan biri amerikalik Terens Krouford bilan jang o‘tkazib, mag‘lub bo‘lgan. Terens ayni vaqtda birinchi yarim o‘rta vazn toifasida WBC, WBA, IBF, WBO kamarlari sohibi hamda The Ring yetakchisi hisoblanadi.

Rio Olimpiadasi oltin medali sohibi Fazliddin G‘oibnazarov professional ringdagi ilk jangini 22 aprel kuni amerikalik Viktor Vaskesga qarshi o‘tkazib, nokaut bilan g‘alaba qozongandi. U 20 mayda ikkinchi jangida amerikalik Agustin Maurasni taslim etdi. Uchinchi jang esa meksikalik Viktor Rosasga qarshi o‘tkazildi.