Shvetsiya rohingyalar holati bo‘yicha BMT Xavfsizlik kengashi yig‘ilishi o‘tkazilishini so‘ramoqda

Shvetsiya Myanmaning Rakhayn shtatida yashovchi musulmonlar rohingyalar holatini muhokama qilish uchun  BMT Xavfsizlik kengashi yig‘ilishi o‘tkazilishini so‘ramoqda. Bu haqda Facebook’da Shvetsiya tashqi ishlar vaziri Margot Valstryom ma'lum qildi.    
  
Yig‘ilishda rakhaynlik qochqinlar holati va ularning vatanlariga qaytarilishi masalalari muhokama qilinadi, deb ta'kidlab o‘tgan vazir. 

Valstryomning yozishicha, Shvetsiya BMT Xavfsizlik kengashining nodoimiy a'zosi sifatida jahon hamjamiyati e'tiborini Myanmadagi vaziyatga qaratish bo‘yicha faol ish olib bormoqda.

Myanmalik rohingyalarga hujumlar 2017 yil 25 avgustda kuchayib ketdi va “qurollangan jangarilarga qarshi kurash” bahonasi ostida olib borilmoqda. Hududdagi gumanitar vaziyat keskin yomonlashgan. BMT ma'lumotlariga ko‘ra, Rakhayndan Bangladeshga qochgan odamlar soni 630 mingdan oshib ketgan. 

1970-yillardan boshlab myanmalik musulmon rohingyalar tizimli hujumlarga va etnik “tozalashlar”ga uchrab keladi. Shu sababli bu yerda yashagan 2 mln rohingyalarning 80 foizi qo‘shni davlatlardan boshpana topishga majbur bo‘lgan. Ayni vaqtda Myanmada 300 ming musulmon qolgan, ular ham Bangladeshda yashirinishga harakat qilmoqda.