Xitoy kommunistik partiyasi Konstitutsiyaga o‘zgartirish kiritib, davlat rahbarining vakolat muddati uchun qo‘yilgan chegarani olib tashlashni taklif qilmoqda. Bu haqda «Sinhua» agentligi xabar tarqatdi.
«Xitoy kommunistik partiyasi XXR raisi vakolat muddatini o‘zgartirish uchun Konstitutsiyani o‘zgartirishni taklif qilmoqda», deyilgan xabarda.
Qayd etilishicha, Konstitutsiyadan davlat rahbarining vakolat muddati bo‘yicha cheklovni olib tashlashdan tashqari, XXR vitse-raisi lavozimini ketma-ket ikki martadan ortiq egallashga bo‘lgan taqiqni bekor qilish taklif etilmoqda.
Bunday o‘zgarishlar Siyosiy byuro majlisidan keyin paydo bo‘ldi. 26 fevral kuni partiya Markaziy qo‘mitasining 3 kunlik yig‘ilishi boshlanadi.
Konstitutsiyaga muvofiq, bir kishi besh yildan ikki muhlatga mamlakat rahbarligiga saylanishi mumkin.
Amaldagi rais Si Jingpin 2023 yilga qadar ushbu lavozimda turishi mumkin. Agar tashabbus ijobiy qabul qilinsa, u 2023 yildan so‘ng ham hokimiyat tepasida qolishi mumkin bo‘ladi.