Qo‘shiqchi Zulayho Boyxonova ijrosida mashhur bo‘lgan “Hay-hay”ning she'r muallifi kimligini bilasizmi? Ushbu she'r va ko‘plab nasr hamda nazm durdonalarini yaratgan adib Saida Zunnunova 1926 yili Andijon shahrida dunyoga kelgan.
Otadan erta yetim qolgan Saida 1941-1943 yillar Andijon o‘qituvchilar institutida tahsil oladi. U Andijon maktablarida muallima, gazeta muharririyatlarida adabiy xodim bo‘lib ishlagan.
Adabiyotga muhabbat shoirani O‘rta Osiyo Davlat universiteti (hozirgi Toshkent Davlat dorilfununi)ning filologiya fakultetiga yetaklagan bo‘lsa ne ajab. Uning «Qizingiz yozdi» (1948), «Yangi she'rlar» (1950), «Gullar vodiysi» (1954), «Qizlarjon», «Bir yil o‘ylari» (1967) she'riy to‘plamlari kitobxonlar mehriga sazovor bo‘lgan.
Saida Zunnunova nasrda ham sermahsul ijod etgan adibadir. Uning «Gulbahor» (1956) hikoyalar to‘plami «Olov» (1962), «Odamlar orasida», «Ko‘chalar charog‘on» (1965), «Bo‘ylaringdan o‘rgilay» (1972), «Direktor» kabi asarlarini xotin-qizlar taqdirini yoritgan nodir asarlardir.
U O‘zbekiston xalq yozuvchisi Said Ahmadning turmush hamrohi, sevimli rafiqasi edi. Ularning yolg‘iz qizlari bor.
Ijodkor ayni kamolot yoshida 1977 yil 51 yoshida og‘ir xastalikdan bevaqt vafot topdi.
