Turkiya, Rossiya va Eron davlatlari prezidentlari Rajab Toyyib Erdo‘g‘an, Vladimir Putin va Hasan Ruhoniy Suriya bo‘yicha qo‘shma bayonotni imzolashdi. Unga ko‘ra, ushbu davlatlar Suriyada tinchlikka erishish bo‘yicha hamkorlikni davom ettirishga kelishishgan.
«Suriyadagi nizoli tomonlar o‘rtasida o‘t ochishni uzoq muddatga to‘xtatish va BMT Xavfsizlik Kengashining 2254-rezolyutsiyasida ko‘zda tutilgan siyosiy jarayonlar amalga oshirilishi uchun faol hamkorlik qilish borasidagi qat'iy pozitsiyamizni tasdiqlaymiz», — deyilgan Eron rahbari matbuot xizmati tomonidan e'lon qilingan bayonot matnida.
Siyosatchilar, «Ostana muzokaralari» Suriyadagi taranglikni yumshatishga xizmat qilganini ta'kidlashgan.
Eron, Turkiya va Rossiya yaqin vaqtlar ichida BMTga Suriya Konstitutsiyaviy komissiyasi faoliyatini yo‘lga qo‘yishda yordam berishga tayyorligini bildirgan. Bundan tashqari, prezidentlar xalqaro hamjamiyatni ushbu mamlakatga qo‘shimcha insonparvarlik yordamlari yuborishga chaqirishgan.
