Tramp Chad fuqarolariga AQShga kirishga ruxsat berdi

AQSh prezidenti Donald Tramp Afrikaning Chad davlatini xavfsizlik nuqtai nazaridan fuqarolari AQShga kirishlari taqiqlangan davlatlar qatoridan chiqarib tashlashni buyurdi.

“Chad fuqarolarining AQShga muhojirlar va ishchi hamda turistik vizalar bo‘yicha nomuhojirlar sifatida kirishlari AQSh manfaatlariga salbiy oqibatlarga ega bo‘lmaydi”, deb aytilgan Tramp buyrug‘ida.

Chad 2017 yilda AQSh bilan xavfsizlik va terrorchilikka qarshi kurash sohasida hamkorlik uchun yetarlicha choralar ko‘rmayotgan davlat sifatida “qora ro‘yxat”ga kiritilgandi. Xususan, AQSh Chad tegishli axborot bilan almashishini hamda Chad fuqarolariga beriladigan hujjatlarning himoyasi kuchaytirilishini talab qilgan. Hujjatda aytilishicha, hozirda Chad AQSh bilan hamkorlikni davom ettirishga sodiqligini isbotlay oldi.

Yuqoridagi ro‘yxatga Chaddan tashqari, Eron, Liviya, Suriya, Yaman, Somali, Sudan va Iroq kiritilgandi. Keyinchalik ro‘yxatdan Iroq va Sudan chiqarib tashlangan, biroq Shimoliy Koreya va Venesuela amaldorlari kiritilgan.