2018 yilda O‘zbekiston 8 mln 235 ming tonna meva-sabzavot mahsulotlarini yetishtiradi

Vazirlar Mahkamasining 3.04.2018 yildagi «Sabzavot-polizchilik, bog‘dorchilik va uzumchilik yo‘nalishidagi fermer xo‘jaliklarining yer maydonlaridan foydalanish samaradorligini oshirish chora-tadbirlari to‘g‘risida»gi 258-son qarori e'lon qilindi.
 
Norma’ning yozishicha, yer sharoiti va suv ta'minoti og‘ir, past rentabelli va hosildorigi kam bo‘lganligi munosabati bilan (oxirgi 3 yilda 15 sentnerdan kam bo‘lgan) 99 371 gektar yer maydoniga paxta va g‘alla joylashtirilmaydigan bo‘ldi. Bunday yerlar Sirdaryo (20 143 ga), Surxondaryo (16 222 ga), Namangan (11 294 ga) va Qashqadaryo (10 000 ga) viloyatlarida ko‘proq ekanligi aniqlandi.  
 
2016–2018 yillarda paxta va g‘alla joylashtiriladigan maydonlarni oldin qisqartirish, shuningdek yuqorida tavsiflanganidek yerlarni bo‘shatish natijasida joriy yilda 1 319 269 ga maydonda 8 235 506 t meva-sabzavot mahsulotlari yetishtiriladi. 

Qishloq xo‘jaligi ishlarini moliyalashtirishga 190 507 t YoMM, 120 090 t mineral o‘g‘itlar, 261 666 t urug‘lik ajratiladi. Ushbu xarajatlarga, shuningdek agrotexnik tadbirlarni o‘tkazish uchun «kafolat mablag‘lari»ni shakllantirishga 5 trln 739 mlrd 535 mln so‘m ajratiladi.
 
Hujjat 4.04.2018 yildan kuchga kirdi.