O‘qotar qurollar olib yurish ruxsat berilgan tashkilotlar xodimlari maxsus kurslarda o‘qitiladi

31 mart kuni O‘zbekiston Respublikasi Milliy gvardiyasi qo‘mondoni B. Tashmatovning O‘zbekiston Respublikasi Milliy gvardiyasi Harbiy-texnika instituti bazasida idoraviy o‘qotar qurol va maxsus vositalarni olib yurish hamda ulardan foydalanishga ruxsat berilgan tashkilotlar xodimlarini tayyorlash va qayta tayyorlash kurslari to‘g‘risidagi nizomni tasdiqlash haqidagi buyrug‘i imzolangan, 12 aprel kuni ushbu nizom Adliya vazirligi tomonidan ro‘yxatdan o‘tkazilgan.

Mazkur nizom O‘zbekiston Respublikasi Milliy gvardiyasining Harbiy-texnik instituti bazasida tashkilotlarning idoraviy o‘qotar qurol va maxsus vositalarni olib yurish hamda ulardan foydalanishga ruxsat berilgan xodimlarni tayyorlash va qayta tayyorlash kurslarida o‘qitish tartibini belgilaydi.

Nizomga muvofiq maxsus kurslar  quyidagilar bo‘yicha nazariy bilimlarni olish va amaliy ko‘nikmalarni mustahkamlash maqsadlarida tashkil etiladi:

(tayyorlash va qayta tayyorlash) fuqarolarning hayoti va sog‘lig‘ini, mol-mulkni, qimmatbaho va xavfli yuklarni, maxsus pochtani qo‘riqlash, tabiat va tabiiy boyliklarni muhofaza qilish, shuningdek qurol va maxsus vositalar muomalasiga doir qonun hujjatlarining asosiy talablari;

qo‘riqlanadigan obektlarni (kuzatilayotgan mol-mulklarni) qo‘riqlash, ularni jinoiy tajovuzlardan himoya qilish, qo‘riqlanadigan obektlarda ruxsat berish va obekt ichki rejimini ta'minlash, xizmat yo‘nalishlarida (postlarda) huquqbuzarliklarning oldini olish va ularga barham berish bo‘yicha xizmat vazifalari, ularni bajarish shakllari va usullari;

qo‘riqlashning (mol-mulklarni kuzatishning) ilg‘or muhandislik-texnik vositalari va usullari, zamonaviy radio hamda simli aloqa vositalarining turlari va texnik tavsiflari, ulardan foydalanish va radioaloqani tashkillashtirish qoidalari;

uyushgan guruh, jinoiy uyushma, terrorchilik-qo‘poruvchilik guruhlari va ularning a'zolari tomonidan qo‘llanilayotgan taktik usullar va ularning xususiyatlari, ular faoliyatini amalga oshirishda foydalaniladigan portlovchi qurilmalar, qurol-yarog‘lar, texnik va boshqa vositalar;

shaxslarni, ularning buyumlarini va transport vositalarini ko‘zdan kechirishning ilg‘or muhandislik va maxsus texnik vositalari, ularning turlari, texnik tavsiflari hamda ulardan foydalanish tartibi;

tan jarohatlarining asosiy turlari bo‘yicha birlamchi shoshilinch tibbiy yordam ko‘rsatish ko‘nikmalari;

tabiiy va texnogen xususiyatli favqulodda hodisalar va vaziyatlarning oldini olish hamda ularning oqibatlarini bartaraf etishda qatnashish;

qo‘riqlanayotgan obektlarni (kuzatilayotgan mol-mulkni) terrorchilik-qo‘poruvchilik harakatlar sodir etilishidan hamda jinoiy tajovuzlardan ishonchli qo‘riqlashni tashkil etishda huquqni muhofaza qiluvchi organlar va boshqa davlat organlari, jamoatchilik vakillari bilan o‘zaro samarali hamkorlikni ta'minlash choralari bo‘yicha nazariy bilimlarni olish va amaliy ko‘nikmalarni mustahkamlash.

Xodimlarni qayta tayyorlash 5 yilda kamida bir marta amalga oshiriladi.

Maxsus kurslarda o‘quv mashg‘ulotlar Institut boshlig‘i tomonidan tasdiqlangan dasturlar asosida o‘tkaziladi.

Maxsus kurslar ishlab chiqarishdan (ishdan) ajralgan holda, odatda, qatnab o‘qish shaklida Institut va tashkilot o‘rtasida tuzilgan shartnomaga muvofiq pullik asosda amalga oshiriladi.

Xodimlarning maxsus kurslardan o‘tganligi ikkinchi ta'lim olish hisoblanmaydi.

Institutda o‘qish davrida xodimlarning asosiy ish joyi bo‘yicha o‘rtacha ish haqi va egallab turgan lavozimi saqlab qolinadi.

Tashkilotlar qurol va maxsus vositalar biriktirilgan o‘z xodimlarini mazkur nizomda belgilangan tartibda maxsus kurslardan o‘tishini ta'minlashi lozim. Maxsus kurslarga yuborilgan xodimlar o‘quv mashg‘ulotlarida ishtirok etishga, institutning ichki tartib-qoidalariga rioya qilishga majbur sanaladi.

Xodimlarni maxsus kurslarga yuborish
Tashkilotlar tomonidan xodimlar quyidagi hollarda qayta tayyorlash kurslarida o‘qitish uchun yuborilishi lozim:

xodimga berilgan sertifikatning amal qilish muddati tugayotganda;
xodimning lavozim majburiyatlari o‘zgarganda (oddiy xodimlar tarkibidagi lavozimdan kichik va o‘rta boshliqlar tarkibidagi lavozimga yoxud kichik va o‘rta boshliqlar tarkibidagi lavozimdan katta boshliqlar tarkibidagi lavozimga o‘tkazilganda).

Maxsus kurslarga tibbiy tekshiruvdan muvaffaqiyatli o‘tgan qurol va maxsus vositalar biriktirilgan xodimlar tashkilot rahbarining buyrug‘iga muvofiq yuboriladi. Tayyorlash kurslariga yuborilayotgan xodimlar tashkilotlarda tashkil etilgan idoraviy jangovar xizmat, ijtimoiy-huquqiy, ma'naviy-psixologik va jismoniy tayyorgarlik kurslaridan ham muvaffaqiyatli o‘tgan bo‘lishi lozim.

Maxsus kurslar ishini tashkil etish
Tayyorlash kurslarining umumiy davomiyligi ikki yarim hafta (90 soat), qayta tayyorlash kurslarining umumiy davomiyligi esa, ikki hafta (72 soat) etib belgilanadi. Bunda, maxsus kurslarda o‘quv yuklamasining eng ko‘p hajmi bir haftada 36 (54 akademik) soatni, auditoriya mashg‘ulotlarining eng ko‘p hajmi esa, 24 (36 akademik) soatni tashkil qiladi.

Xodimlar maxsus kurslarda o‘qishni tugatgandan so‘ng maxsus, jismoniy va o‘q otish tayyorgarligi bo‘yicha imtihonlarni topshiradi.

Imtihonlar
Imtihon topshiriqlari maxsus kurslar dasturlariga muvofiq tuziladi. Imtihon natijalari 100 ballik tizimda baholanadi. Imtihon natijalari bo‘yicha belgilangan eng yuqori ballning kamida 70 foizini to‘plagan xodimlar imtihondan o‘tgan hisoblanadi.

Imtihon komissiyasi bayonnomasiga asosan bir ish kuni ichida imtihonlardan muvaffaqiyatli o‘tgan xodimlarga sertifikat, imtihonlardan o‘ta olmagan xodimlarga esa, ular maxsus kurslarni tamomlaganligi to‘g‘risidagi ma'lumotnoma beriladi. Sertifikat va ma'lumotnomalar Institut boshlig‘i tomonidan imzolanadi.

Xodimlar maxsus kurslarni tamomlagani to‘g‘risidagi hujjatlarni topshirish
Imtihon komissiyasi bayonnomasiga asosan bir ish kuni ichida imtihonlardan muvaffaqiyatli o‘tgan xodimlarga sertifikat, imtihonlardan o‘ta olmagan xodimlarga esa, ular maxsus kurslarni tamomlagani to‘g‘risidagi ma'lumotnoma beriladi. Sertifikat va ma'lumotnomalar institut boshlig‘i tomonidan imzolanadi.

Sertifikat besh yil muddatga beriladi. Sertifikatlar qat'iy hisobda turadigan hujjatlar hisoblanadigan, hisobga olish seriyasiga, tartib raqamiga va himoyalanganlik darajasiga ega bo‘lgan maxsus blankalarda rasmiylashtiriladi hamda Institutda maxsus kurslar turi bo‘yicha yuritiladigan tegishli reyestrda hisobga olinadi. Sertifikatlar xodimlarga reyestrda imzo qo‘ydirgan holda beriladi.

Yakuniy qoidalar
Xodim quyidagi holatlarda maxsus kurslardan chetlashtiriladi:
o‘quv intizomini va institutning ichki tartib-qoidalarini buzganda yoki shaxsiy intizomsizligi sababli;
o‘quv mashg‘ulotlarning 10 foizdan ortiq qismini uzrli sabablarsiz qoldirganda;
sog‘ligi sababli mashg‘ulotlarni uch kundan ortiq qoldirganda;
xodim sudning qonuniy kuchga kirgan hukmiga asosan ozodlikdan mahrum etilganda;
xodim vafot etganda.