2025-yilda dunyodagi milliarderlar soni 8,2 foizga oshib, rekord darajadagi 3795 kishini tashkil etdi. Rossiyada bu koʻrsatkich 18 foizga oʻsib, 151 kishiga yetgan. Bu haqda Altrata kompaniyasining Billionaire Census tadqiqotida (.pdf) xabar berildi.
Umuman olganda, Rossiya milliarderlar soni boʻyicha dunyoda toʻrtinchi oʻrinni egalladi. Birinchi oʻrinni katta farq bilan AQSH band etgan boʻlib, u yerda dunyo milliarderlarining deyarli uchdan bir qismi – 1265 kishi istiqomat qiladi. 2024-yilda ularning soni 11,5 foizga koʻpaygan. Ikkinchi oʻrinda 363 nafar milliarder bilan Xitoy (+13,1 foiz), uchinchi oʻrinda esa 221 nafar vakil bilan Germaniya (+20,1 foiz) qayd etilgan. Shuningdek, Germaniya 15 ta davlat orasida eng yuqori oʻsishni namoyon etdi. Beshinchi oʻrinni 132 nafar milliarder bilan Hindiston egallagan (+3,9 foiz).
Milliarderlarning umumiy boyligi 12,8 foizga oʻsib, rekord darajadagi 15,1 trillion dollarga yetdi. Sayyoramizning eng badavlat 29 nafar kishisi hissasiga milliarderlar umumiy boyligining 27 foizi toʻgʻri keladi, holbuki bu koʻrsatkich 2017-yilda 7 foizni tashkil etgan edi. Tahlilchilar bu yilgi oʻsishning asosiy omillaridan biri sifatida sunʼiy intellektga kiritilayotgan sarmoyalar hajmining keskin ortganini qayd etdi.
