NNTning tadbirlarni kelishish tartibi bu haqida xabardor qilish bilan almashtiriladi

O‘zbekiston Respublikasi prezidenti tomonidan joriy yilning 4 may kuni “Mamlakatni demokratik yangilash jarayonida fuqarolik jamiyati institutlarining rolini tubdan oshirish chora-tadbirlari to‘g‘risida”gi farmon qabul qilindi.

Farmon bilan bevosita O‘zbekiston Respublikasi prezidenti huzurida Fuqarolik jamiyatini rivojlantirish bo‘yicha maslahat kengashi tashkil etilib, ushbu kengashga fuqarolik jamiyatini va keng jamoatchilikni tashvishlantirayotgan dolzarb masalalarni muhokama qilish, shuningdek mazkur sektorning holati va rivojlanish tendensiyasi haqida bevosita O‘zbekiston Respublikasi prezidentini muntazam ravishda xabardor qilish va Fuqarolik jamiyatini rivojlantirish bo‘yicha qulay sharoitlar yaratish yuzasidan prezidentga takliflar kiritish vazifasi yuklatildi.

Shuningdek, Farmonda NNT faoliyatiga doir kamchilik va to‘siqlarni bartaraf qilish maqsadida joriy yilning 1 iyunidan boshlab yangicha tartiblar o‘rnatilishi qayd qilindi.

Xususan, NNTga ma'lum darajada qiyinchiliklar keltirib chiqarishga sabab bo‘lib kelayotgan NNTning tadbirlarni kelishish tartibi bu haqida xabardor qilish tartibi bilan almashtirildi.

Shu bilan birga, bu sohadagi ortiqcha qog‘ozbozlikni tugatish maqsadida 2019 yil 1 yanvargacha bo‘lgan muddatda:

NNTni va ularning ramzlarini davlat ro‘yxatidan o‘tkazish, qayta ro‘yxatdan o‘tkazish;

NNTning o‘tkazilishi rejalashtirilayotgan tadbirlari haqida xabardor qilish;

NNTning o‘z faoliyati to‘g‘risidagi yillik hisobotlari;

NNT tomonidan chet davlatlardan, xalqaro va xorijiy tashkilotlardan, chet davlatlarning fuqarolaridan yoki ularning topshirig‘iga binoan boshqa shaxslardan pul mablag‘lari va mol-mulk olishni kelishish elektron tarzda amalga oshirilishi belgilab qo‘yildi.

Shu bilan birga, NNT tomonidan pul mablag‘lari va mol-mulkdan erkin foydalanishini ta'minlash maqsadida NNTga Xorijiy sub'yektlardan kelib tushgan pul mablag‘lari va mol-mulkdan foydalanish bo‘yicha (ro‘yxatdan o‘tkazuvchi organ bilan belgilangan tartibda kelishilgandan so‘ng) barcha to‘siqlarni olib tashlanadi.

Shuningdek, NNTga har qanday bank xizmatlarini ko‘rsatish bo‘yicha o‘zlariga ma'qul va qulay bo‘lgan bankning xizmatidan foydalanishni ta'minlash maqsadida NNTga xorijiy grant mablag‘lari mazkur tashkilotlarning istalgan bank muassasalarida ochilgan maxsus hisobvaraqlariga kelib tushishiga ruxsat beriladi.

Nodavlat notijorat tashkilotlari tomonidan ishchi-xodimlarga yagona ijtimoiy to‘lov stavkasi 25 foiz miqdorida qo‘llanilishi NNTga homiylik va a'zolik badallaridan kelib tushadigan pul mablag‘larini aniq manzilli yetkazilishida uzilishlarga sabab bo‘layotgan edi.

Shunga ko‘ra, farmon tadbirkorlik faoliyati bilan bog‘liq bo‘lmagan kelib tushgan mablag‘lar hisobidan shakllantiruvchi nodavlat notijorat tashkilotlari uchun yagona ijtimoiy to‘lov stavkasi 15 foizdan ko‘p bo‘lmagan miqdorga tushirilishi nazarda tutildi.

Amaldagi “Jamoat fondlari to‘g‘risida”gi Qonun talablariga ko‘ra jamoat fondi ma'muriy xarajatlarining, shuningdek, vasiylik kengashi
va taftish komissiyasi a'zolariga beriladigan mukofot puli to‘lovlarining va ular o‘z vazifalarini bajarishi bilan bog‘liq xarajatlar kompensatsiyasining yillik umumiy summasi fondning barcha xarajatlari summasining 20 foizidan oshmasligi lozim edi.

Bu esa, fond tomonidan xodimlarini fond ustavida ko‘rsatilgan maqsad va vazifalarni amalga oshirishdagi mehnatlarini rag‘batlantirishda ma'lum qiyinchiliklar keltirib chiqarar edi.

Shu munosabati bilan, Farmonda jamoat fondi ma'muriy xarajatlarining, shuningdek, vasiylik kengashi va taftish komissiyasi a'zolariga beriladigan mukofot puli to‘lovlarining va ular o‘z vazifalarini bajarishi bilan bog‘liq xarajatlar kompensatsiyasining yillik umumiy summasi fondning barcha xarajatlari summasining 20 foizidan 30 foiziga oshirilishi belgilab berildi.

NNTning pensioner xodimlariga pensiya ularning mazkur tashkilotlardagi faoliyati yagona ish joyi bo‘lgan taqdirda, to‘liq to‘lanishi kabi imkoniyatlar amaliyotga joriy qilinadi.

Farmon bilan NNTning eng asosiy muammolaridan biri bo‘lgan bino masalasi “Nodavlat notijorat tashkilotlari uylari”ni tashkil etish orqali yangicha usul bilan hal qilish belgilab berildi.

Mazkur “Uylar”dagi xonalar NNTga ijara to‘lovining “nol” stavkasini qo‘llagan holda joylashtirish nazarda tutilmoqda.

Shu bilan birga, farmonda bugungi kunga qadar e'tibordan chetda qolayotgan fuqarolik jamiyati institutlari vakillari tomonidan olib borilayotgan o‘ziga xos mehnatni qo‘llab-quvvatlash maqsadida “Fuqarolik jamiyatini rivojlantirishga qo‘shgan hissasi uchun” ko‘krak nishonini ta'sis etish belgilab qo‘yildi.

Xulosa qilib aytganda, qabul qilinayotgan qonun hujjatlari NNTning huquqiy maqomi, roli va ahamiyatini kuchaytirishga qaratilgan. Bundan ko‘zlangan maqsad ularning yanada samarali faoliyat olib borishlarini ta'minlashdan iborat.

Adliya vazirligi mas'ul xodimi

J.Uzakov