“Diydor yoshlar eksperimental teatr-studiyasi” davlat muassasasi tashkil etiladi 

Normativ-huquqiy hujjatlar loyihalari muhokamasi portalida Vazirlar Mahkamasining “Diydor” rejissyorlik va aktyorlik mahorati teatr-studiyasi” davlat muassasasi negizida “Diydor yoshlar eksperimental teatr-studiyasi” davlat muassasasini tashkil etish to‘g‘risida”gi qarori loyihasi joylashtirildi.

Hujjat bilan O‘zbekiston Respublikasi Madaniyat vazirligi, O‘zbekiston Teatr arboblari uyushmasi va Toshkent shahar hokimliklarining “Diydor” rejissyorlik va aktyorlik mahorati teatr-studiyasi” davlat muassasasi negizida “Diydor yoshlar eksperimental teatr-studiyasi” davlat muassasasini tashkil etish to‘g‘risidagi takliflari ma'qullanishi mumkin.

Belgilab qo‘yilishicha:

Teatr-studiyasi “Diydor” rejissyorlik va aktyorlik mahorati teatr-studiyasi” davlat muassasasining barcha huquq, majburiyat va shartnomalari bo‘yicha huquqiy vorisi hisoblanadi.

Quyidagilar teatr-studiyasining asosiy vazifalari etib belgilanadi:

o‘sib kelayotgan yosh avlodning ma'naviy, badiiy-estetik ruhiyatini yuksaltirish, tafakkurini boyitish, mustahkamlash, ularning san'atga bo‘lgan muhabbatini kuchaytirish, o‘zbek milliy teatr san'ati tarixiy asoslari va yutuqlarini yoshlar qalbiga chuqur singdirish, jahon andozalari asosida zamonaviy, xorijiy davlatlardan malakali mutaxassislarni jalb qilgan holda ta'lim berish, respublikamizda madaniy-ma'rifiy, ijodiy-badiiy sohalarda erishilayotgan yutuqlarni teatr san'ati orqali targ‘ib etish;
teatr, kino, teatrlashtirilgan ommaviy tadbir rejissyorlari va aktyorlarni kashf etish, mahoratini oshirish hamda ma'naviy qo‘llab-quvvatlash;
yoshlarning ijodiy faolligini rivojlantirish, o‘sib kelayotgan yosh avlodni vatanparvarlik, milliy qadriyatlarimiz ruhida tarbiyalash, sohadagi ilg‘or uslublarni milliy ruh bilan uyg‘unlashtirilgan holda teatr san'atiga tatbiq etish;
turli madaniy-ma'rifiy tadbirlar, gastrollar, ko‘rik-tanlovlar, festivallar, taniqli san'atkorlar bilan uchrashuv va anjumanlar, rejissyor va aktyorlar uchun mahorat darslari va teatr san'atidan saboq beruvchi o‘quv mashg‘ulotlar o‘tkazish, jahon madaniyati va san'atining yorqin namunalari bilan tanishtirish orqali ularni barkamol insonlar bo‘lib kamol topishlariga ko‘maklashish.

Quyidagilar teatr-studiyasi faoliyatini moliyalashtirish manbalari etib belgilanadi:

O‘zbekiston Respublikasi Davlat byudjyeti mablag‘lari;
yuridik va jismoniy shaxslarning homiylik xayriyalari;
xalqaro moliya institutlari hamda donor tashkilotlar grantlari;
qonun hujjatlarida taqiqlanmagan boshqa manbalar.    

Toshkent shahar hokimligi:

teatr-studiyaning moddiy-texnik bazasini mustahkamlash maqsadida bir oy muddatda Mirzo Ulug‘bek tumani, Buyuk Ipak Yo‘li ko‘chasi Markaz-1 mavzesi 9-uyda joylashgan binoning 248 kv.m. maydonini teatr-studiyaga operativ boshqarish huquqi asosida bepul berilishini ta'minlaydi;
O‘zbekiston Respublikasi Madaniyat vazirligi bilan birgalikda teatr-studiyaning ijodiy faoliyatini yanada rivojlantirish va o‘ziga xos xususiyatini inobatga olgan holda, Toshkent shahrida foydalanilmayotgan binoni ajratish hamda teatr-studiyaning samarali faoliyat olib borishi uchun zamonaviy yangi bino qurish bo‘yicha ikki oy muddatda Vazirlar Mahkamasiga tegishli takliflarni kiritadi.